Tun-an pa

CEBU, Philippines - Gibutyag ni Willie Revillame nga bukas siya sa posibilidad nga mosulod sa politika. Gitataw niya nga kinahanglan nga tun-an kini og maayo. “Pag-iisipan kong mabuti ‘yan,” hirit pa sa TV host.

Mike wala magdali

Tsika pa ni Mike Tan nga 10 na ka tuig ang relasyon nila sa iyang non-showbiz girlfriend apan wala pa sila’y plano nga magpakasal. Suma pa sa aktor nga duna pa sila’y gustong buhaton sa tagsa-tagsa nila nga kinabuhi.

Jackie gikapoy og pinaabot

Gilaayan na si Jackie Foster sa pagpinaabot sa sitwasyon nga tagdon na siya sa duha niya ka anak nga sila si Andre ug Kobe. Gibuhat na niya ang tanan apan wala pa gyud siya tinggi niini.”It’s time to let it go,” suma pa ni Jackie.

Higala gyud?

Giangkon  ni Andi Eigenmann nga si Jake Ejercito maoy gipasabot sa iyang tweet nga, “Omg this person is the scum of the Earth!”  Suma pa sa aktres nga ingon niini sila ka-komportable sa usa’g-usa isip managhigala. Dali nga naka-react ang iyang mga kritiko gumikan kay hagbay ra nga nasayod ang kadaghanan nga nagbalik silang duha.

Banana Split giplanohan ni Wendell

Gawas sa drama, nailhan usab si Wendell Ramos kaniadto nga maayo sa natad sa komedya busa target usab niya nga malakip sa gag show sa ABS-CBN nga “Banana Split. Kahinumduman nga pipila ka tuig siya nga kabahin sa Bubble Gang sa GMA-7 kaniadto.

Nahigugma gihapon

Giangkon sa kanhi produkto sa Pinoy Big Brother nga si Karen Reyes nga  naa pa siya’y feelings ngadto sa iyang  ex-boyfriend  nga si Ryan Boyce kinsa ka-batch niya sa maong reality show. Suma pa ni Karen nga nagkabuwag sila ni Ryan gumikan kay duna’y mga butang nga dili sila magkasinabot busa nakahukom sila nga magbuwag.

Alakim nakagawas sa prisohan

Nakagawas na sa prisohan si Allan dela Paz nga nailhan sa  kadaghanan isip ­Alakim.  Nisikat ang magician nga si Alakim human kini nahimong grand finalist kaniadto sa Pilipinas Got Talent Season 1 sa ABS-CBN. Ang maong magician gipasanginlan nga duna’y kalambigitan sa kamatayon sa iyang asawa niadtong 2012.

Misamot kailado

Nagpungasi ang pagsaka sa popularidad ni Wally Bayola gumikan sa iyang pagka-kontrabida sa kinabuhi nila ni Yaya Dub ug Alden Richards sa Eat Bulaga. Kanunay nga pangandaman ni Wally ang mga eksena niya matag-adlaw ilabi na nga live ang pag-arte niya sa telebisyon.

Sarah Carlos gibirahan

Karon pa lang daan, gibirahan na sa fans nila ni Daniel Padilla ug Kathryn  Bernardo  ang aktres nga si Sarah Carlos gumikan sa role niini isip Bea Blanca nga kontrabida  sa seryeng Pangako Sa ‘Yo. Gipistahan og maayo ang eksena kung diin gisagpa ni Bea Blanca si Angelo nga gidala ni Daniel.

Nagngulngol ang likod

Gikatahong nibalik ang pagpanakit sa buko-buko ni Angel Locsin ug giingong taud-taud na kini nga gihambin sa aktres. Matud pa nga nakuha kini ni Angel gikan sa iyang pagkatagak sa kabayo pito ka tuig na ang milabay atol sa shooting sa pelikula nila ni Piolo Pascual nga Love Again. (Sanden J. Anadia)