Semana Santa

BisChika nga Domingo mga SweetKaButanding! Pila nalang ka adlaw Semana Santa na ug sigurado gyud ko nga aduna na kamo’y mga plano kung asa kamo magbakasyon ug manghinaut ang inyong Mother Butanding nga dili ninyo kalimtan ang mamalandong aron balanse ang life.

Ipaambit lang nako ang akong kasinatian sa dihang gikuyog ko sa akong prayer buddy nga si Gilbert Manego para sa usa ka Lenten Recollection. Sa tinuod lang, una kini nakong higayon nga musalmot og ingon ani nga activity. Mapasalamaton kaayo ko kay daghan kaayo kung nakat-unan ug mga realization sa akong kinabuhi. Dili lamang nga duna koy mga bag-ong higala, kundili kay mas na-appreciate nako og samot ang kinabuhi. Tinuod ang problema naa lang gyud kana permi, parte sa atong kinabuhi apan kung kahibalo ka nga mosampit sa Kahitas-an makaya lang gyud nimo. Lisod ang magpasaylo sa mga tawong nagpasakit nimo, apan kung imong buksan ang imong kasingkasing sa pagpasaylo mas mogaan ang imong pamati.

Ang maong Lenten Recollection gipasiugdahan sa Lingkod ng Panginoon-Mactan ug ang among facilitator kay si Bro. Pascual Cahayagan. Gipaambit niya ang tulo ka puntos kabahin sa kwarisma.

Una, nga kining atong kinabuhi ug talento ato lang gihulaman sa Ginoo - kay kita gikan sa abo, muoli usab kita sa abo.

Ikaduha, gikan sa musical term nga ang pasabot kay “slow down“ or maghinayhinay lang- mao nga sa kapaspas sa panahon ug permi kita nagdali, mao kini ang panahon nga mohinay-hinay ug mamalandong. Ikatulo, gikan sa German word nga “lente“  nga  pasabot  spring time -mao nga karun palang hinay-hinay na kita magtanom og kaayuhan para sa atong kaugalingon ug sa atong isigkatawo.

Usa sa mga nakaHugyaw nga akong gibuhat kauban si Sir Gilbert mao ang pagbuhat og Road Map to Lenten. Sugod niadtong Marso 1 hangtud sa April 4 nagmugna kami og mga activities o sakripisyo para sa umaabot nga kwarisma. Dako kaayo ang akong kalipay nga pinaagi ni Sir Gilbert kining among road map hinay-hinay namong nabuhat. Ako mismo sa kadugay nga panahon karun pa nako nabuhat og balik! Sama sa unang semana sa Marso nag-visita iglesia kaming tulo kauban si Jayver sa mga simbahan sa Lapu-Lapu/ Cordova hangtud nasundan kini sa ikaduhang semana sa Marso didto napud sa north area kami niduaw. Sa tinuod lang ang ubang simbahan first time ko nakasulod. Ug labaw sa tanan human sa kapin 10 na ka tuig nakapangumpisal ko pag-usab. Noh? Murag gusto ko mohilak pagpangumpisal, maayo nalang napugngan pa gyud nako. Ang pagsakripisyo dili nimo buhaton sa pag-fasting lang, dili lang sa pagkaon og baboy, pwede usab ang paghinay-hinay sa imong gibuhat sama sa pagFB ug pagduwa og computer games. Para good feeling a small act of charity will make you feel better!

Mao nga sa dili pa mo mangandam sa inyong mga sul-ubon sa beach, kan-on ug uban pa, apila sa listahan ang oras para KANIYA, ang atong ginoo nga gilansang sa krus ug namatay gumikan  sa atong mga sala! Amen!