My Experience

Okay sumpay ni  sa atong column niadtong nakalabay nga Domingo. Salamat diay kang Ycheel Syriash nga gi-picturan ang atong okRYAN ug gi-upload sa Facebook. Salamat sab sa mga nibasa ug sa mga nagbasa karon. Bitaw, di niingon ko last Sunday nga ayaw lang kaayo mo’g dahom kun ingnon mo nga tawagan lang mo kay sometimes mao nay nice way of telling you nga wala ka nadawat or dili ikaw ang empleyado nga ilang gipangita? Actually based on my experience to akong tips. Bitaw, nahuman nako akong masscom degree og tulo ka tuig ug one semester kay required man ang summer class namo. Paspasay ang show! Pakkk!

So after graduation, nibalik ko sa El Nuevo Bantay Radyo diin didto ko nag-intern. Gidawat man ko dayon nila kaluoy sa Ginoo. Akong first assignment kay desking (kanang ikaw magsuwat sa tanang balita gawas sa local news items, nga maoy basahon sa anchor sa major newscast). Tulo ra ko ka adlaw didto, ug nipauli kos Pilar Camotes kay gilaay ko. Feeling nako dili pa gyud ko ganahan mutrabaho, ganahan pa ko mupahuway kay gikapoy pako’g sige og eskuyla. Hahaha! So didto ko’s Camotes nag-istar gikan November hangtud January. Paghuman sa Sinulog nibalik ko sa Cebu kay nang-apply og trabaho kay feeling nako adto ready nako. Akong gisuwayan nga dili media related so mao to nga submit ko’g resume ug application letter bisag asa na lang basta ang requirement kay four-year course graduate, with pleasing personality ug good communication skills (assuming nga naa ko ana, hahaha). Pakkk!

Ang unang nanawag kay tindahan og LPG (liquefied petroleum gas) diha’s Magallanes. Sales representative ang gipangita ato. Gi-interview ko ug gipa-take og written exam. Nataypan ko sa interview kay alegre kuno ko paminawon basta muistorya, makalingaw. Pero pagpangutana kun ganahan ba ko mubaligya og LPG, niingon man ko nga mura’g dili nako kaya, (kay wala gyud koy talent anang mamaligya gud, alangan og mamakak ko), so maong na spug ko. Pero gitarong man sab ko ato’g balibad. Dili ra maka-hurt. Gwapo ra ba tong insik nga nag-interview nako. Pakkk!

Sunod kay walk-in interview sa usa ka hotel dapit sa Capitol. Front desk ang gipangita. Gi-interview akong beauty, perte intawon nakong paningkamot og iningles uy, bahala’g nagkasapid-sapid akong dila. Gi-orient ko unsay duties and responsibilities sa front desk, feeling nako madawat na ko ato. Ayy giingnan man ko nga tawagan ra daw ko. Okay, I smiled and went away. Sus, tulo na man lang ka adlaw wa man gyud ko tawgi, pwes akoy nanawag. Wala pa baya ko kasabot that time nga mao diay nay nice way of telling you nga you did not get the job. Hahahaha. Ang naa sa akong hunahuna kay manawag gyud ko aron makasabot sila nga interesado kaayo ko sa trabaho (pero the truth was, nagtinga nako ato uy, niresulta na akong pagka jobless ba…hahahaha). Sus, napudpud na man lang akong tudlo og dial sa ilang numero intawon uy, perte pa nakong memorize og iningles nga isulti ngadto sa mutubag sa phone. Ang ending, busy man gyud permi ilang number. Asa ang hustisya? Hahahaha…mao to ako na lang tong gikalimtan, I moved forward. Pakkk!

Daghan pa kaayo ko’g gi-aplayan sa una uy, wa man gyud ko nadawat. So nganong nilandig man ko sa Cebu media industry? Atangi sunod Domingo puhon kay naa sab koy hugyaw nga istorya sa wala pa ko niabot sa akong nahimutangan karon. 

Pangitaa ko sa Facebook: [email protected]