Mansion ni JLo

CEBU, Philippines – Ang Filipino boxing icon nga si Manny Pacquiao nagplano nga mopalit og mansion nga unang gipanag-iya sa international superstar nga si Jennifer Lopez. Ang maong mansion nahimutang sa Beverly Hills, California nga nagkantidad og $12 million o kapin sa P500 million. Suma pa ni Pacman nga nagpadayon pa ang hinangyoay sa presyo.

Alang sa anak

Nagkauban sila si Raymart Santiago ug Claudine Barretto sa Fun Run nga gisalmotan sa ilang anak nga si Santino. Suma pa ni Raymart nga importante ang ilang presensya aron magmalipayon ang ilang anak sa maong kalihukan.

Inatiman sa uyab

Matag human sa taping sa seryeng  Pangako Sa ‘Yo, dili gyud sipyaton ni Jodi Sta. Maria ang pagduaw sa iyang boyfriend nga si Jolo Revilla sa  balay niini sa Alabang. Gipamatud-an ni Jodi nga dili tinuod ang report nga nag-away sila ni Jolo.

Mopahuway sa pagpa-sexy

Gipadayag ni Bangs Garcia nga temporaryo siya nga dili modawat og sexy project. Nalingaw ra si Bangs sa uban niya nga mga proyekto nga dili kinahanglan magpa-sexy.

Target sa Mega Star

Gipangandoy ni Sharon Cuneta nga makabaton siya og serye sa ABS-CBN kung diin makauban niya ang iyang anak nga si KC Concepcion. Gusto usab niya nga makauban sa umaabot niya nga projects ang mga lalaki nga niagi sa iyang kasing-kasing nga sila si Richard Gomez ug Gabby Concepcion. Okay ra pud niya nga iyang makatrabaho ang ex-boyfriend ni KC nga si Piolo Pascual.

Robi n napungot sa korte

Napungot og maayo si Robin Padilla human gitugtan sa korte sa  Quezon City Regional Trial Court nga makagawas ang Maguindanao Massacre suspect nga si Sajid Islam Ampatuan. “Tunay po na wala nang naghaharing batas sa Inang Bayan Pilipinas. Tunay po na walang piring ang mata ng hustisya. Tunay po na walang ngipin ang gobiyerno para sa mga makapangyarihang tao,” suma pa sa Instagram post sa aktor.

Okay na ang kahimtang

Malipayong gibalita ni Cristine Reyes nga nakagawas na sa tambalanan ang anak nila ni Ali Khatibi nga si Baby Amarah kinsa nahimugso nga premature. Wala pa’y ideya ang aktres kung kanus-a siya makabalik sa showbiz gumikan kay hatagan gyud niya og dakong atensyon ang iyang anak.

Neo mihimakak

Gihimakak sa  singer  nga si Neo Domingo ang report nga nag-link sa iyang pangalan ngadto sa YouTube sensation nga si  Michelle Liggayu kinsa girlfriend sa nipanaw na nga  si Jam Sebastian.    Giklaro ni Neyo nga higala niya ang Jamich gumikan kay nakauban niya kini sa short film nga Classmates.

Lakambini

Si Lovi Poe maoy modala sa karakter ni  Gregoria de Jesus alang sa indie movie nga si Lakambini. Si Gregoria maoy asawa sa Katipunan founder nga si Andres Bonifacio .

Xian ug Toni hosts sa Bb. Pilipinas

Sila si Toni Gonzaga ug Xian Lim ang magpares isip mga hosts sa Bb. Pilipinas Coronation Night karong Domingo, March 15, sa Araneta Coliseum.

Ikaduhang higayon na kini ni Xian isip host sa nahisgutang nasudnong indigay. Ang una, nahitabo sa nilabay nga tuig diin nagpares silang duha ni Anne Curtis.

Makauban nila ni Toni ug Xian ang tulo ka Miss Universe runners-up sa nasud nga sila si Venus Raj, Shamcey Supsup ug Ariella Arrida suma pa sa www.normannormanblog .

Sa nahisgutan nga blogsite may mga nihangop sa maong balita gumikan kay si Xian lamang matud pa ang haom sa maong hosting job sanglit, gwapo, taas ug maayo mu-pronounce ang nahisgutan ug maayo usab matud pa ang performance niini sa nilabay nga tuig.

Apan may mga niiknat ang kilay sa maong balita, gumikan kay angayan matud pa nga hatagan og kahigayonan ang uban.