Happy Tanan!

Hugyaw nga Domingo mga Sweet KaButanding! Init na gyud kaayo ang panahon karun kay naa na ang gitawag nila nga Summer Time. Ug siyempre ang pangutana andam na ba kamo para sa inyong summer destinations? Akong Butanding body kay andam na gyud molangoy sa dagat. Hahahahhaha! Mao nga usa sa mga BisChika nako puhon dinhi akong paambitan akong kasinatian sa pagtikang unya nako sa usa sa mga summer destinations sa nasud kauban ang inyong mga paboritong Kapuso stars. Pagkakaron kay surprise lang usa kay basin masuhong, (dili ko madayon), wala pa man gud nako ang confirmed tickets. Mao nga waiting mode ang inyong Mother Butanding!

Pero kining kasinatian sa inyong Yur’s truly niaging semana naghatag kanako og dakong kalipay nga kay nakatrabaho nako ang usa sa mga reporters ug host sa GMA7 nga sila si Ms. Susan Enriquez ug Licensed Zumba Instructress Regine Tolentino. Nahitabo kini niadtong nag-live ang UH (Unang Hirit – the longest morning show of GMA 7) sa Sugbo para sa ilang UH-Almusal kung diin nagpakaon ang programa sa mga CPDRC dancing inmates. Siyempre kay live sila 5am mo roll ang camera, maong akong beauty sayo usab kaayo nimata para sa ilang call time. Tuod man, sa walay pagduhaduha naabot ko sa oras nga dapat naa ko.  Una nakong nakit-an si Mareng Susan Enriquez nga nangandam na usab plus naa si Regine nga nagtudlo og sayaw sa mga dancing inmates. Sa wala pa nagsugod ang show nakahigayon ko pagBisChika kang Mareng Susan ug gipangutana nako siya kung giunsa niya pagbalanse ang iyang schedule nga sayo kaayo ang UH.  More or less mao pud ang akong gibuhat: “ matulog ng maaga“.  Mao ra gyud ang sikreto sa mga adunay sayong trabaho, ang matulog usab og sayo. O di ba hugyaw?

Positive vibes ang mugna namo kay nagluto ko og danggit, buwad, pusit, chorizo ug uban pa. Dihang nag-live na me ni Mareng Susan, ako siyang gihatagan og tips  unsaon pagluto ang danggit, nga dili parat kaayo: pwede nilang hugasan ug labaw sa tanan kung mopalit sila og danggit sa Tabo-an dili sila maligo! Hahahhahaha! Nagkatawa si Mareng Susan!  Naunsa man pagka hitaboa nga bisan wala nay nakatutok nga camera, nagpadayon lang gyud ko og luto? Nindot man gud ang feeling nga makatabang ka sa imong gamay nga pamaagi. Boodle Fight ang pamaagi sa pagkaon. Murag niagi ang bagyo kay nahurot gyud, hasta ulo sa lechon wala pasayloa. Eat all you can… Hahahahahaha! Pero okey lang! Diha puy pandesal on the side with matching init nga kape ang among gipang-apud-apud.

Nanguli kami nga very happy kay ang mga CPDRC dancing inmates busog kaayo ug dagko kaayo og ngisi..Nalipay usab ko nga ni message sa Instagram account nako si Regine Tolentino og,“ Thanks so much! Had fun! You’re so nice and funny : )

Malipayon usab kaayo ko kay karun adlawa ang akong BFF nga si Frances “Angel “Gacasan nag- celebrate sa iyang birthday. Manghinaut ko nga mas daghan pang birthday nga muabot ug maayo permi ang iyang lawas hilabina nga naa siya sa gawas sa nasud nanarbaho. Thankful usab kaayo ang Gay’s Unlimited kay bisa’g layo siya gipaambit usab niya ang iyang grasya. Happiness ang peg sa tanan!