White Summer

CEBU, Philippines - Nagkainit na gyud ang panahon, busa ang pipila ka nato moingon nga nabatyagan  na gyud nila ang summer season, busa kinahanglan nga mosul-ob gyud og sapot nga dili kaayo nimo ma-feel ang kaalimuot sa palibot.

Ang sikat nga designer sa Sugbo nga si Lemuel Rosos mipaambit sa iyang tips alang sa hayahay nga pagpamilli sa imong sul-obon karong summer ilabi na kung maglaag-laag ka.

Kung siya ang pasultion, labing maayo nga mosul-ob og sapot nga color white aron hayahay kaayo ang imong paminaw bisan pa man sa kainit sa panahon.

Ug summer ang dating niini kung duna kini binuwakan nga desinyo sanglit panahon man ron sa pagpamunga sa mga buwak.

Gipadayag ni Lemuel, nga kung gusto ka makadaginot, mahimo ra nimo nga gamiton ang imong karaan nga mga sapot nga kolor puti ug makamugna ra ka og imong desinyo.

Samtang gilusad na pud ni Lemuel ang summer workshop nga gitawag niya og #getLemuelized kung diin alang kini sa mga tawo nga gusto molambo ang ilang abilidad sa saktong pagpaso,  pag-istorya ug angayan nga mga buhaton sa mga tawong nagplano nga mosalmot og indigay.

Ang workshop himuon diha sa Montebello Villa Hotel ug mahimong makontak si Lemuel aron masuta sa mga  pamaagi sa pagsalmot niini. Ang iyang contact number, 09257770955.

Gretchen i-ampo ang mga hingaway

Iampo na lamang matud pa ni Gretchen Barretto ang mga tawo nga nagsige og pangaway ug buot mupasakit niya. Sa iyang pagsaulog sa iyang ika-45 ka tuig nga kasumaran sa iyang adlaw nga natawhan, padayon matud pa niyang palambuon ang iyang relasyon sa Ginoo ug palibutan ang iyang kaugalingon og mga tawo nga positibo ang panlantaw sa kinabuhi.

Carmina ug Paulo magchula!

Adunay love ug kissing scenes sila si Carmina Villaroel ug Paulo Avelino sa umaabot nga teleserye sa ABS-CBN, ang “Bridges” nga magsugod na karong March 16, isip hulip sa Two Wives. Socialite nga obsess sa character ni Paulo ang role ni Carmina sa maong serye diin bida sila si Jericho Rosales ug Maja Salvador.

Party sa fans

Nagpahigayon og party ang mga fans ni Julia Barreto niadtong Biyernes sa gabii isip pahinungod sa iyang pagsaulog sa iyang debut karong umaabot nga Martes.

Dominique  di makatambong

Dili makatambong si Dominique Cojuangco sa debut sa iyang ig-agaw nga si Julia Barretto karong March 10, gumikan kay wala pa mahuman ang iyang klase didto sa London. Nagkaistorya na matud pa sila ni Julia ug nakasabot kini kaniya. Si Dominique anak ni Gretchen Barretto ug Tony Boy Cojuangco.

Bea nahagbong sa sailboat

Nalandig sa emergency room si Bea Alonzo niadtong nilabay nga adlaw human nahulog sa sailboat atol sa shooting sa iyang umaabot nga pelikula. Maayo na lamang kay mga garas ra diha sa iyang tuo nga kamot ang iyang nahiaguman.

May ka relasyon na?

May mga nagduda nga aduna nay bag-ong ka relasyon si Sunshine Cruz karon gumikan sa iyang post sa Instagram nga nagkanayon: It’s time to be happy again.”

Istoryahon si Dong

Giklaro ni Dondon Monteverde nga higala gihapon niya si Dingdong Dantes ug  girespeto kini niya. Tinguha niya nga magkaistorya sila kabahin sa isyu nga “nagmukhang tanga” ang aktor og paabot nga sugdan na ang pelikula nga ubos sa direksyon ni Erik Matti, apan nahingangha na lamang siya nga nagsugod na ang shooting niini ug si John Lloyd Cruz na ang bida, ug wala siya pahibaw-a.

Tingog diha Matti!

Gumikan sa nahitabo, nabanhaw ang isyu tali ni direk Erik Matti ug Lovi Poe kaniadto diin nibalibad ang aktres nga mulugwa pagbalik sa Tiktik nga gibituonan ni Dingdong Dantes niadtong Disyembre. Labihang nakayawyaw ni Matti batok kang Lovi niadtong tungora gumikan kay unprofessional matud pa ang aktres. Karon, panawagan sa mga netizen nga magyawyaw na sab si Matti, aron hatagan og katin-awan nganong gipulihan niya si Dingdong kang John Lloyd Cruz ug gitraydor ang ilang panaghigala.