Daniel sikat gyud hasta standee buot paliton

CEBU, Philippines - Nahugyaw ang mga kadagkuan sa Belo Essentials gumikan kay hasta standee sa ilang bag-ong brand ambassador nga si Daniel Padilla buot nga paliton.

Apan dili kini baligya, suma pa sa marketing manager sa Intelligent Skin Care Inc. nga si Lerma Mendoza.

“Grabe pala talaga ang mga fans, kahit hindi gamit ng idolo nila, kahit hinahawakan lang ni Daniel bibilhin nila,” nagkanayon si Mendoza ngadto sa Banat News Hugyaw kagahapon human sa press briefing sa usa ka hotel dinhi sa Sugbo.

Suma pa ni Mendoza nga aron malipay ang mga fans, aduna matud pay mga sabon nga baligya nila ang adunay autograph matud pa ni Daniel.

Si Daniel ang labing bag-ong endorser sa maong kompaniya alang sa Belo Men Acne Control line.

Atol sa press briefing kagahapon, gipasabot ni Mendoza nga ang kasikat ni Daniel ang usa sa mga rason nganong siya maoy ilang gikuha isip brand ambassador. Matud pa niya murag niatras matud pa sila niining maong lakang kun tan-awom ang pangidaron sa ilang mga endorsers nga lalaki sanglit ang nauna nilang mga brand ambassador mao man sila si Derek Ramsay ug Dingdong Dantes.

“This is a new product and we want him to represent the younger market, we are catering to the younger segment naman,” nagkanayon si Mendoza.

Nasayud matud pa sila nga ang kinabag-an sa mga fans ni Daniel mga batan-ong babaye, apan komedya niya nga ang maong mga fans na matud pa maoy mudasig sa ilang mga kuya o ba kaha uyab aron ang produkto nga gigamit sa ilang idolo, maoy paliton ug gamiton sa mga nahisgutan.

Una niini, gipadayag ni Mendoza nga buotan matud pa kaayo si Daniel, ug mauwawon. Kugihan usab matud pa ang giisip nga “Teen King” ug walay “diva factor”.