Gihangop sa masa

CEBU, Philippines – Giangkon ni  Zanjoe Marudo nga nasorpresa siya sa paghangop sa publiko sa tandem nila ni  Beauty Gonzalez sa seryeng Dream Dad  sa ABS-CBN. Mapasalamaton si Zanjoe sa positibong feedback nga nadawat sa maong serye.

Wala pa mahusay

Gipadayag sa GMA Network nga wala pa’y nahitabo nga  settlement tali sa istasyon ug kang Aljur Abrenica kalabot sa kaso nga gipasaka kaniadto sa aktor batok sa iyang mother network. Padayon hinuon ang paglugwa ni Aljur sa ubang mga show sa GMA-7 ug panghinaut sa kampo sa aktor nga mahilot na sa dili madugay ang ilang kasungian.

Dennis motikang sa party

Gibutyag ni Dennis Padilla nga molugwa gyud siya sa debut sa iyang anak karong March 10. Nalipay si Dennis gumikan kay kinasing-kasing gyud ang nadawat niya nga imbitasyon gikan sa iyang  anak.

Dingdong naamong

Dili hatagan og gibug-aton ni Dingdong Dantes ang mga obserbasyon sa mga tsismosa nga matud pa nga siya ang lalaki nga gipasabot ni Karylle sa lenggua niini sa programang It’s Showtime nga nakasuway na siya og uyab niduwa og laing babaye. “Wala naman sigurong sinasabing ako yun,” suma pa ni Dingdong.

Paulo mitin-aw sa report

Gisalikway ni Paulo Avelino ang report nga matud pa nagbuwag na sila ni KC Concepcion. Suma pa ni Paulo nga maghigala lang sila ni KC busa dili mahitabo ang maong sitwasyon.”Paano ba naman magbi-break ang magkakaibigan?,” suma pa ni Paulo.

Hapit mabiktima

Giangkon ni Kim Chiu nga hapit siya nabiktima kaniadto sa “Dugo-dugo gang” ug iyaha kining gibutyag sa programang Kris TV kagahapon. Nagdumili hinuon si Kim sa pagbutyag kung kanus-a kini nahitabo. Matud pa niya nga samtang naa siya sa taping, adunay tawo nga nanawag sa ilang balay ug giingnan ang iyang katabang nga duna’y nahitabong dautan sa aktres ug nalandig kini sa tambalanan busa kinahanglan nga ipaabli ang safety box sa balay. Maayo na lang gani nga napakgang kini sa igsuon ni Kim kinsa naa sa balay niadtong higayona atol sa pagpanawag sa mangingilad.

Hayag na ang kaugmaon

Gipaneguro ni Sarah Geronimo nga molambo ang singing career sa iyang alaga nga si Jason Dy. Giingong hayag na ang singing career ni Jason human kini nahimong grand winner sa The Voice of the Philippines Season 2.

Kitchie minyo na

Gikasal na diay sa miaging semana ang 34 anyos nga singer nga si Kitchie Nadal finally ngadto sa iyang  American boyfriend nga ginganlan og Carlos didto sa  Hacienda Isabella, Tagaytay City.  Upat ka tuig na ang relasyon sa duha busa nagkailhanay na sila og maayo sa usa’g-usa.

Pawala sa kapoy

Gipadayag ni Enrique Gil nga mawala gyud ang iyang kapoy basta makakita siya kang Liza Soberano. Una na nga gibutyag sa aktor nga na-develop na siya sa iyang leading lady sa seryeng Forevermore.

Gisaulog sa Cebu

Sa Cebu gisaulog dili pa lang dugay nila ni  Zsa Zsa Padilla ug sa iyang  boyfriend nga si Conrad Onglao ang first anniversary sa ilang relasyon.  Kontento si Zsa Zsa sa dagan sa ilang relasyon.

Miangkon sa iyang ka-OA

Kever ra si Alex Gonzaga sa mga tawo nga motawag kaniya og OA o over acting gumikan kay tinuod man kini.  “Totoo naman ang observation nila,” suma pa ni Alex.

Maningkamot gyud

Giangkon ni Maja Salvador nga bisan sa iyang ka-busy, mangita gyud siya og paagi nga magkakita sila sa iyang boyfriend nga si Gerald Anderson.

Career ang prayoridad

Gihimakak ni  Ellen Adarna ang taho nga matud pa gidiskartehan siya ni  Ejay Falcon nga gitudlong maoy rason sa breakup nila sa iyang non-showbiz boyfriend nga si Raul Olbes. Suma pa ni Ellen nga prayoridad niya ang iyang career. Giklaro usab ni Ellen nga September pa sa miaging tuig nagbuwag sila ni Raul.  

Joanna Marie in a dozen

Kanunay magminaldita atubangan sa kamera gumikan sa kaangayan sa iyang dagway nga magkontrabida.

Ang 21 anyos nga si Jhoanna Marie Ramilo Tan kasamtangang nagtagbaw sa iyang tulin nga career bisan pa man katagsa ra siya mahimong bida sa mga serye sanglit ang labing importante kaniya nga duna siya’y trabaho.

Niadtong 2009, nikisaw ang pangalan ni Jhoanna human siya ang nidala isip batang Eunice sa Pinoy remake sa Korean series nga Stairway To Heaven sa GMA-7.

Pagkahuman niadto, nagbaha na dayon ang iyang proyekto  ug usa na niini ang paglugwa niya sa seryeng Katorse sa ABS-CBN, ingon man usab sa drama anthology nga Maalaala Mo Kaya.

Dali ra usab siya gikuha og balik sa GMA-7 ug ang iyang mga proyekto naglangkob sa mga  programang  One Day, Isang Araw, Anna Karenina, Paroa: Ang Kuwento ni Mariposa, Magpakailanman: The Lucy Aroma Story, One True Love, Alakdana, Tween Hearts, Bantatay, Sine Novela: Basahang Ginto, First Time ,The Last Prince, Yagit ug Strawberry Lane.

Nakasuway na usab siya sa mga pelikula sama sa Mano Po 2: My Home (2003) ug Just One Summer (2012).

Lola nga taga Carcar nalipoay kang Marian

Napuno ang carpark sa Gaisano Grand Mall sa Carcar City sa 7,000 fans nga naghugop atol sa Kapuso Fans’ Day ni GMA Primetime Queen Marian Rivera niadtong Pebrero 17.

Usa ang 86 years old  nga si Lola Salud sa mga nalipay ug nalingaw kang Marian. Lakip si Lola Salud sa libuan nga supporters nga nilinya gyud ug nagpaabot nga maaninaw ang ilang idolo. Tuod man, wala nakawang ang pagpaabot ni Lola Salud gumikan kay usa siya sa mga napilian aron pasak-on sa stage ug gigakos pa gyud siya ni Marian.

Samtang Jennifer Lopez ang peg ni Marian niadtong higayona. Kiay kun kiay gyud iyang drama ug kanta kun kanta sa awit nga On The Floor atol sa maong mall show, diin kauban sab niya si Boobay isip host.

Karong Mayo, subli na nga makit-an sa primetime si Marian pinaagi sa upcoming drama series nga The Rich Man’s Daughter.

Sen. Bong nakaduaw kang Jolo

Emosyonal si Senator Ramon “Bong” Revilla, Jr. samtang giduaw niya ang iyang anak nga si Cavite Vice Governor  Jolo Revilla sa  Asian Hospital and  Medical Center sa  Muntinlupa City kagahapon.

Kahinumduman nga gitugtan sa Sandiganbayan kagahapon ang mosyon ni  Senador Bong Revilla nga makaduaw kini sa iyang anak sulod sa  lima ka oras o gikan sa alas 3 sa hapon hangtud sa alas 8 sa gabii.

Gihilantan og maayo si Jolo Revilla gumikan sa grabeng bleeding sa iyang baga. Padayon nga giobserbahan si Jolo sa mga doktor human sa aksidenteng napusilan niini ang iyang dughan. Karong March 15 na ang 27th birthday  ni Jolo busa dili pa segurado kung duna ba’y engrandeng selebrasyon.

Mr. & Miss Olive C Pambato sa Sugbo dili mabentahaan!

Ang tag-iya sa  Psalmstre nga maoy tigama sa bantogan na kaayo nga Olive-C mihulagway nga mga lig-on ang pambato sa Sugbo alang sa national pageant sa Mr. and Ms. Olive-C Campus Model of the Philippines 2015.

Duha ka paresan ang mopresenta sa Sugbo sa maong indigay nga pagahimuon didto sa Manila sa katapusang bahin karong Mayo.

Ang mga babaye nga kandidata naglangkob nila ni Princess Jayme, 18 anyos nga nagtungha sa Cebu Normal University ug ang 18 anyos nga tinun-an sa Cebu Institute of Technology nga si Norecel Ibanez.

Samtang ang mga lalaki mao sila si Frederick Lance Catacutan, 14 anyos nga nagtungha sa St. Thomas Aquinas sa Talisay City,  ug ang 18 anyos nga si Raymund de Vera nga nagtungha sa Cebu Maritime Education  and Training Center.

Kahinumduman nga duha ka mga paresan ang napili nga Mr. and Ms. Olive-C Campus Model- Cebu  nga gipahigayon dili pa lang dugay sa University of the Visayas- Main Campus kung diin si Acosta mismo ang nibarog nga chairman sa mga hurado.

“Gusto talaga namin na matulungan ang mga kabataan na matupad ang kanilang mga pangarap. Lalo na sa mga teenagers na mangarap sumali ng malalaking pageant o kaya gustong pumasok sa showbiz.  Ang Mr. and Ms. Olive-C Campus Model of the Philippines ang magiging instrumento sa kanilang mga pangarap,” suma pa ni Acosta sa gipahigayon nga press conference kagahapon.

Moabot ngadto sa 24 ka paresan ang magtigi sa national level sa maong kompetisyon nga nagikan sa nagkalain-laing dapit sa nasud.