Proposal sa himpapawid at iba pang nakakamanghang videos, itinampok ni Atom

MANILA, Philippines – Sari-saring videos na nakakamangha, nakakagulat, kakaiba, at tumatagos sa puso ang hatid ni Atom Araullo tuwing Miyerkules ng hapon sa RealiTV,  kung saan tampok ang iba’t ibang tunay na mga pangyayaring nakunan ng kamera.

Bukod sa mga video, magbibigay din ang Reali-TV ng mahahalagang impormasyon sa mga manonood sa pamamagitan ng pagbabahagi ng mga kwento ng karanasan ng mga taong sangkot sa mga bidyo at tips mula sa mga eksperto.

Simula kahapon, sari-saring kwento ng puso ang hatid ni Atom sa mga bidyong panalo sa kilig at swak sa inyong trip.

Sa pagdiriwang ng buwan ng mga puso, ipinakita sa programa ang astig na video ng isang open heart surgery, at pati si Kuya Kim Atienza ay ibinahagi ang kanyang karanasan noong siya ay ino­perahan.

Bumida rin ang mga kakaibang wedding proposal ng mga kala­lakihan na isinagawa nila sa lupa man, ilalim ng tubig at himpapawid. Iba’t ibang estilo man, iisa lang ang kanilang mga layunin: makamit ang matamis na “oo” ng kanilang kasintahan.

At dahil pag-ibig ang pag-uusapan, hindi lang ito pang-magkasintahan kundi pagmamahal at pagtulong din sa kapwa, kaya naman ang mga video ng pagsagip at kabayanihan ng mga Pinoy ay mapapanood din.

Tuwing Miyerkules palabas ang RealiTV, 4:30PM sa ABS-CBN.