Jadine gikagubtan sa Qatar

CEBU, Philippines – Gikagubtan og maayo sila si James Reid ug Nadine Lustre sa dihang nitikang sila sa Doha, Qatar dili pa lang dugay alang sa labing una nila nga show sa abroad.  Liboan ka mga Pinoy sa maong dapit  ang nalipay og maayo sa ilang presensya.

Pa-cute ra !

Gipadayag ni Xian Lim nga gamay na lang ang kulang, ug hapit na gyud siya sugton ni Kim Chiu.  Apan miisa ang mga kilay sa iyang kritiko gumikan kay hagbay ra sila nga nagtuo nga dugay na ang relasyon nila ni Xian ug Kim.

Game show ang gipalabi

Gibalibaran ni Luis Manzano ang pelikula nga pagaparesan unta nila ni Alex Gonzaga gumikan kay busy siya sa nakalinya niya nga game show sa ABS-CBN. Naandan na nga si Luis gyud ang himoong host sa mga dagkong game show sa maong network.

Kontento sa sustento

Malipayon si Sunshine Cruz gumikan kay malinawon na ang iyang kinabuhi ug kontento na siya sa sustento nga ihatag ni Cesar Montano alang sa ilang mga anak. Una na nga gipadayag ni Sunshine nga wala na siya’y plano nga makigbalik sa aktor.

Ipasalmot sa Italy

Malipayong gipahibalo ni Anne Curtis nga giimbitar sa usa usa ka international film festival didto sa Italy ang pelikula niya niadto nga The Gifted. Gawas kang Anne, bida usab sa maong pelikula sila si Sam Milby ug  Cristine Reyes.

Jake nagmika

Giingong luya kaayo ang dagway ni Jake Vargas  sa dihang nilugwa kini sa Walang Tulugan sa miaging gabii.  Gidudahan nga nasakitan gihapon si Jake human sila nagbuwag ni Bea Binene.

Ryza busy sa negosyo

Gawas sa showbiz, ang pagpamaligya og cupcake maoy usa sa gikabisihan Ryza Cenon. Malipayon ang aktres gumikan kay nagkaanam-anam og kusog ang iyang negosyo.

Lisod nga role

Giangkon ni Ken Alfonso nga dili lalim ang iyang role isip kontrabida sa seryeng Kailan Ba Tama Ang Mali?. Lapad gyud nga preparasyon ang iyang pagabuhaton sa dili pa siya motikang sa taping.  “Mahirap po pala ang maging kontrabida,” nagkatawang gipadayag ni Ken.

Sakpan

Nasigpatan sila si Andi Eigenmann ug Jake Ejercito nga nag-uban sa  UP Town Center Liberty Steakhouse. Sweet na kaayo ang duha karong panahona .  

RR ug Jeck gilabhan sa netizens

Gilabhan og maayo sa netizens  ang  Happy Wife, Happy Life stars nga sila si  RR Enriquez ug Jeck Maierhofer human nikatap ang ilang  video  kung diin ilang giserbatohan ang natulog nga  tawo nga sakay sa usa ka pampasahero nga van.

Giingong nakamata ang maong tawo gumikan sa kakusog sa serbato ug puwerting pangatawa nila ni RR ug Jeck.

Pipila ka netizens ang nipadayag nga wala’y batasan ang duha gumikan kay tataw kaayo nga nagbugal-bugal sila og tawo nga wala manghilabot kanila. Sa pagsulat niinig balitaa, nagpakahilom pa sila si RR ug Jeck kalabot sa maong isyu.

Cesar ug Giselle mitikang sa Maguindanao

Nitikang sila si  Cesar Montano ug  Giselle Sanchez sa  Mamasapano, Maguindanao sa miaging adlaw kung diin nahitabo ang engkuwentro nga  gikamatyan sa 44 ka mga sakop sa Philippine National Police-Special Action Force (PNP-SAF).

Kauban sa duha sa pagbisita sa area mao sila si    Autonomous Region of Muslim Minadanao Governor Mujiv Hataman ug ang local government officials sa  Mamasapano.

Gilakaw gyud nila ni Cesar ug Giselle ang tulo ka kilometros nga agianan padulong sa area kung  diin nahitabo ang engkuwentro tali sa SAF , Moro Islamic Liberation Front (MILF) ug Bangsamoro Islamic Freedom Fighters (BIFF).

Giimbitar ang duha alang sa usa ka peace concert  niadtong Biyernes sa gabii sa Office of the Regional Governor sa  Cotabato City ug midalikyat na lang pud sila sa pagtikang sa Mamasapano.

Sold-out

Gikatahong sold-out na ang ticket sa umaabot nga concert ni Jennylyn Mercado karong February 13 sa SM Skydome. Ang maong concert nag-ulohan og Oo Na, Ako Na Mag-isa, Samahan ‘Nyo Naman Ako . Suma pa ni Jen nga wala gyud mausik ang  iyang kakapoy ug ganado kaayo siya sa mga rehearsal .

Iñigo makauban sa Kathniel

Malakip ang anak ni Piolo Pascual nga si Iñigo sa umaabot nga pelikula nila ni Kathryn Bernardo ug Daniel Padilla nga Crazy Beautiful You sa  Star Cinema . Dili na gyud kapugngan ang nagsagunson nga mga proyekto ni Iñigo.

Jam gibisita ni Vice

Gibisita ni Vice Ganda  sa tambalanan niadtong Sabado ang YouTube sensation nga si Jam Sebastian.  Una na nga gipadayag ni Jam nga ganahan gyud siya nga makakita og balik sa  komedyanteng TV host.

Follow-up project dayon

Nahuman na niadtong Biyernes  ang serye nila ni Andrea Torres ug Mikael Daez nga Ang Lihim Ni Annasandra.  Nalipay ang aktres gumikan kay hatagan dayon siya og follow-up project sa GMA ug sugdan na ang taping niini sunod bulan.

Gikapoy og hisgot

Gipadayag ni Dingdong Dantes nga mo-focus siya sa iyang career ug sa  relasyon nila ni Marian Rivera isip magtiayon  busa moundang na siya og tubag sa mga pangutana nga maghisgot og politika. Nasayran nga makadaghan na nga higayon nga gidungog nga posibleng mosulod si Dingdong sa kalibutan sa politika.