Mestisang Caviteña

CEBU, Philippines – Dako ang posibilidad nga malakip sa umaabot nga album ni Janno Gibbs ang awit nga  Mestisang Caviteña. Si Dingdong Dantes maoy lyricist niini ug iyaha kining gipa hinungod ngadto sa iyang asawa nga si Marian Rivera.

Mga negosyante

Gikatahong dili basta-basta ang principal sponsors sa umaabot nga kasal nila ni Sen. Chiz Escudero ug Heart Evangelista gumikan kay mga negosyante ang kasagaran niini. Kini sama nila ni Ramon Ang, Fernando Zobel de Ayala, Lance Gokongwei, Felipe, Hans Sy, Atty. Felipe L. Gozon, ug Gabby Lopez.

Gidumogan gihapon

Bisan gasige og uwan karon didto sa Benguet, wala gihapo’y puas ang pagbisita sa mga tawo sa set sa seryeng Forevermore.  Nasayran nga nahimo na nga tourist attraction ang maong dapit.

Proyekto ni Arnel nahilom

Kalit nga nahilom ang music competition nga gipasiugdahan ni Arnel Pineda nga Asian Music Camp. Kahinumduman nga hugyaw ang paglusad niini sa miaging tuig.

Nakugang sa role

Giangkon ni Angelica Panganiban nga nakugang gyud siya niadto sa dihang gitanyagan siya nga modala isip inahan ni Daniel Padilla sa remake sa Pangako Sa’Yo. Gipangandaman gyud sa aktres ang karakter ni Claudia Buenavista nga unang gidala kaniadto ni Jean Garcia. Nagmalaumon si Angelica nga mahatagan niya og hustisya ang papel sa usa ka inahan.

Okay lang

Andam sila si Kim Chiu ug Maja Salvador nga mag-uban og balik sa serye. Nasayran nga taud-taud na nga nagtingog ang duha. 

Panghiaboto sa likod

• Gikuyogan matud pa pagawas sa entablado si Miss Russia human kini ni kisikisi kay wala nakauyon nganong 4th runner-up ra si Miss Jamaica.

• Si Miss Russia ang nag-una pag-cheer para kang Miss Jamaica ug nisunod ang ubang kandidata. Gialsa nila si Miss Jamaica kay para nila siya gyud ang tinuod nga Miss Universe winner.

• Nakuyapan matud pa si Miss Puerto Rico. Wala matino kun gumikan ba sa resulta.

• Duha pa mga kandidata ang nag-walkout kay wala matud pa nakauyon sa resulta.

• Nadakin-as si Madam Stella Marquez Araneta sa iyang pagpa-ingon sa venue sa Miss Universe pageant kagahapon. Si Araneta maoy chairperson sa Bb. Pilipinas Charities Inc.

• Nagpasalamat si Miss Philippines MJ Lastimosa sa tanan niyang fans nga nisuporta niya. Giluwatan niya ang iyang pasalamat pinaagi sa Instagram pipila ka minutos human sa pageant.

Ms Colombia gyud ang rayan!

Gikoronahan isip Miss Universe 2014 si Miss Colombia Paulina Vega sa nagmalampusong   grand coronation night nga gipahigayon sa FIU Arena sa Doral, Miami, Florida.

Gipukan sa 22-anyos nga Business Administration student nga si Paulina  ang laing  87 ka mga  kandidata.

Atol sa question and answer portion, ang MTV star nga si Rob Dyrdek maoy nangutana kang Paulina nga nagkanayon ,”What could women learn from men?.”

Nitubag dayon si Paulina og, “A lot of men still believe in equality. I think that’s the thing that women we should learn from men.”

Samtang sa ikaduhang hugna sa pangutana  alang sa mga  nasulod sa  Top 5 nagikan sa Facebook ang online question nga nagkanyon,” “What is the greatest contribution of your country to the entire world?”

Nigahot dayon si Paulina og, “I believe that my country has become an example to the Western counterparts. We continue fighting for that one true republic.”

Ang pambato sa USA nga si Nia Sanchez maoy  first runner-up , samtang  second runner-up usab  si  Diana Harkusha nga kandidata sa  Ukraine .

Napili nga third runner-up ang pambato  sa Netherlands nga si Yasmin Verheijen ug ang pambato sa Jamaica nga si Kasi Fennel maoy fourth runner-up.

Ang special awards naglangkob sa Miss Congeniality( Nigeria), Miss Photogenic – (Puerto Rico) ug Best in National Costume( Indonesia).

Samtang ang pambato sa Pilipinas nga MJ Lastimosa wala masulod sa Top 5 ug igo ra kini nakatungtong sa Top10.

Una niini, gitagna na nga si Vega gyud maoy marayna gumikan kay “complete package” matud pa kini.