Kris napungot

CEBU, Philippines – Napungot pag-ayo si Kris Aquino sa netizen  nga mihingalan sa iyang anak nga si Bimby og “toyab” nga binali sa bayot busa andam siya mosukol niini. Dali nga nangayo og pasaylo kaniya ang maong netizen.  “If I ignore, I’m not doing my job of protecting my son. Ang DUWAG eh,” tweet pa ni Kris.

Busy ang peg

Gibutyag ni Piolo Pascual nga panagsa na lang niya nakauban ang iyang anak nga si  Iñigo sulod na sa pipila ka semana. Suma pa ni Piolo nga busy na kaayo ang anak sa showbiz. “Mas busy pa siya sa akin,” nagkatawang gipadayag sa actor.

Kathniel makauban si Sandy

Puwering lipaya ni Sandy Andolong gumikan malakip siya sa remake sa Pangako Sa Yo nga pagabidahan nila ni Kathryn Bernardo ug Daniel Padilla. Siya maoy modala nga apohan ni Daniel.

Naputos sa trabaho

Napuno na ang schedule ni Jennylyn Mercado sa tibuok buwan sa Pebrero.  Gawas sa seryeng Second Chances, giingong nagbaha karon ang endorsements ni Jennylyn Mercado sukad napili nga best actress sa miaging Metro Manila Film Festival  2014 alang sa pelikulang English Only Please.   

35th Cebu Pop padayon sugbuanon nangharos!

Napuno sa pagmaya ug hudyaka ang 35th Cebu Popular Music Festival diha sa Cebu Coliseum niadtong Biyernes sa gabii.

Nangharos ang kanta nga “Padayon Sugbuanon” nga entry sa Cebuano Rock category, sanglit mao kini nakalangkat sa grand prize ug naghimo usab nga best interpreter sa niawit niini.

Ang Padayon Sugbuanon ginama ni Manolito Languido ug gihatagan og kinabuhi ni Jamila Albino.

Gibutyag ni Jamila nga wala gyud siya nagdahom  ilabi na pagkadungog niya sa ubang mang-aawit nga grabe usab ka lig-on.    .

Wala katambong sa maong kalihukan ang composer niini nga si Manolito gumikan kay aduna kini importanteng giasikaso

Dili na bag-o si Jamila sa Cebu Pop, apan katapusan niyang salmot niadto pang 2002 diin siya sab ang niadaog isip best interpreter niadtong tuiga.

“Nindot gyud og tingog ang tanang nanganta. Akong gibuhat , kay gi-enjoy ra gyud nako ang akong pagkanta sa stage,” matud pa ni Jamila..

Usa sa preparasyon ni Jamila mao ang kanunay nga pagsimba sa Sto. Niño ug gani duna siya’y gipangkansela nga mga lakaw aron lang gyud siya makabisita kanunay sa milagrosong bata.

Ang awit nga Padayon Sugbuanon nagtuki kung unsa ka maisogon ang mga Sugbuanon sa pagsagubang sa mga kalamidad  ug dili gyud kini magpatandog bisan paman nga giigo pa sila og bagyo sanglit nipatigbabaw gyud ang pagtuo nila sa Ginoo.

Samtang ang makalingaw nga Nalumos sa Sabaw nga ginama ni Fr. Lyndon Ruiz ug  gihatagan og kinabuhi nila ni  Mc Rey uban nila ni John Michael Bengil sa Echo Banda ug John Joseph Russel sa Grasrots maoy champion alang sa RnB category.

Napili usab nga grand champion alang sa Ballad category ang ginama ni Cerj Michael nga “Salamat Na Lang“ kung diin siya ra usab ang nihatag og kinabuhi sa iyang komposisyon, pinaagi usab sa lyrics ni Andro Banate.

Sa pakighinabi sa Banat News Hugyaw (BNH) sa composer sa “Nalumos Sa Sabaw nga si Fr. Lyndon, gipadayag niya ang dako niyang gibati nga kalipay sa dihang gianunsyo  isip mananaug ang ginama niya nga kanta kung diin nakaingon siya nga daghan gyud  ang nahimuot niini.

Gipatigbabaw sa maong kanta nga kinahanglan gyud hatagan og saktong bili ang kaminyuon gumikan kay segurado gyud nga magmalipayon gyud ang tanan kung tibuok ang pamilya.

Sa maong awit, nangita ang bata sa iyang amahan ug gitubag na lang kini sa iyang inahan nga nalumos kini sa sabaw aron dili madaot ang imahe sa amahan nga hagbay ra nga nibiya kanila.

“Ato gyud nga hinumduman kanunay nga sagrado gyud ang kaminyuon, kung mag-uban na gani, kinahanglan gyud na ang kasal. Kinahanglan pud nga barugan gyud nimo ang imong pamilya aron pud dili maapektohan ang inyong anak,” nagkanayon si Fr. Lyndon.

Dugang pa niya nga usa kini sa kisaw nga isyu karong panahona busa mao gyud kini ang nahuna-hunaan niya nga tema sa paggama sa maong awit.

Tataw nga nakapahimuot gayud sa bagang duot sa katawhan nga nisaksi sa 35TH Cebu Pop ang nahisgutan nga kanta, gani dihang giawit na kini Mc Rey ug mga kaubanan, giabibahan sila og maayo.

Gisaysay ni Mc Rey nga kung naa lang gyud ka sa saktong konsentrasyon, dali ra gyud ang paghatag og kinabuhi sa usa ka kanta.

Sa pikas bahin ang interpreter/composer sa “Salamat Na Lang” nga si Cerj niangkon nga dili lalim ang iyang naagian sanglit gitambagan siya sa doctor nga ipahuway ang iyang tingog apan iyang gisagubang ang risgo sanglit gusto gyud niya nga mosalmot sa maong kompetisyon isip halad niya kang Señor Sto. Niño.

Samtang ang banggiitan na nga si Nendel Endrina maoy arranger sa maong awit.

Ang awit nga “Salamat Na Lang“ naghisgot sa tawo nga nibalibad sa hangyo sa kanhi niya hinigugma  nga magbalik na lang silang duha human pipila ka tuig nila nga panagbuwag.

Matud pa nga naka-move on na ang lalaki human siya gibuwagan niadto sa babaye  ug giingong magpabilin na lamang nga kagahapon ang tanan tali kanilang duruha.

“Dako gyud ang akong pasalamat, kining tanan ako gyud nga gihalad sa tanang tawo nga nisuporta kanako. Magpasalamat usab ko ngadto kang Sto. Niño sa iyang pagiya kanako,” matud pa ni Cerj.

Nasayran nga aktibo kaayo si Cerj sa pag-compose og mga kanta, gani aktibo gyud siya sa tinuig Marian Song Festival.

Samtang ang  amahan sa Cebu Popular Music Festival, Atty. Eduardo Gullas nipadayag nga dako kaayo og natabang sa pagpalambo sa industriya sa musika ang Cebu Pop ug nagpadayon gihapon kini hangtud karon sanglit had na niya kini ngadto kang Sr. Sto. Niño matag tuig.

Special guest usab niadtong gabhiona ang champion sa Stars on 45 sa It’s Showtime nga si Archie Marcial, kanhi produkto sa Pilipinas Got Talent ug The Voice nga si Jem Cubil ug ang  maanyag nga si Monique Santos .

Gihatagan usab sa Eduardo R. Gullas Award ang Cebuano singer nga si Max Surban gumikan sa dako nga natampo niini sa Sugbuanong musika ug naukay usab pag-ayo ang audience gumikan sa iyang pagkanta .Mapasalamaton si Max nga bisan sa kadugay na niya, padayon gihapon nga gihangop ang iyang mga awit ug wala gyud mahupas ang popularidad niini.

Si Max maoy nagpasikat sa   mga awit nga Kuntis sa Hambog,  Mayano,  Kiringking (Cha-cha), Sabungero, Human Da-an ug daghan pa.