SSinulog Idol “Dilao” nga SIlaw Mipatigbabaw!

CEBU, Philippines - Makaingon ang 19 anyos nga tinun-an sa Cebu Normal University nga si Kristina Cassandra “KC”  Dilao nga debuwenas gyud niya ang tuig 2015 gumikan sa iyang kadaugan sa Sinulog Idol 2015 kung diin siya mismo ang napili nga champion.

Ang Talisaynon nga si KC mibutyag  nga gibuhat niya ang tanan niya nga mahimo aron lang gyud matarong niya ang iyang performance sa grand finals ug giangkon niya nga puros gyud nindot og tingog ang ubang contestants.

“Para nako nindot na kaayo ang feeling nga nakaapil ko sa Sinulog Idol kay dili man gud lalim ang among gipang-agian. Salamat kaayo sa tanan , labi na sa akong friends , family ug kang God nga grabe gyud ang gihatag nga support kanako,” suma pa ni KC  sa dihang nahinabi sa mga sakop sa media pagkahuman sa Sinulog Idol grand finals niadtong Huwebes sa gabii nga gipahigayon diha sa Fuente Osmeña Circle.

Naukay pag-ayo ang audience kang KC atol sa final round gumikan sa maayong pagkanta niya sa Somewhere .

Kasamtangang tinun-an si KC sa kursong BS English Language sa CNU.

Napuno sa emosyon ang pagdawat ni KC  sa iyang tropeyo gumikan kay wala siya kasabot sa iyang  gibati ug mapasalamaton siya gumikan kay niresulta gyud ang iyang kahago.

Ang pag-ampo ug todo nga pag-praktis  maoy mga  instrumento ni KC  kung nganong natarong ang iyang performance sa  entablado.

“Bisan kulba, kinahanglan nga mo-focus gyud ka sa imong kanta kung naa naka sa stage,” dugang pa niya.

Ang resident judges sa maong kompetisyon nga sila si ex-Pinoy Dream Academy scholar Apple Abarguez, Ultimate Voice and Performance coach Jay Unchuan ug  Banat News Hugyaw (BNH) editor Ryan Mark  nipadayag nga  nagnindot gyud ang mga performance sa finalists.

Napili usab nga first runner-up ang book keeper sa usa ka kompanya dinhi sa Sugbo nga si Joie Lyn Catamora kinsa miawit sa hugyaw niya nga version sa I Believe.

“Target gyud nako sa una nga masulod sa top 3, gibuhat lang gyud nako ang akong best aron mahatagan nako og saktong emosyon ang akong gipangkanta sa contest,” matud pa ni Joie.

Gradwado si Joie sa kursong BS Management Accounting sa University of San Jose Recoletos .

Samtang napili nga second runner-up sa Sinulog Idol Season 6 ang tinun-an sa kursong BS Industrial Engineering sa USJR nga si Charlie Sumalinog.

Giawit niya sa final round ang What Kind of Fool Am I kung diin sipa nga pakpak ang iyang nadawat gikan sa audience.

Nasayran nga kuha kaayo ni Charlie ang tingog sa singer nga si Erik Santos ug usa kini sa rason nga maukay kaniya ang mga tawo.

“Lipay kaayo ko nga nasulod ko sa top 3. Wala gyud ko mag-expect ani kay puros man gud nindot og tingog akong mga kauban,” suma pa ni Charlie.

Usa sa gituman niya nga disiplina aron ma-mintina ang kanindot sa iyang tingog mao ang kanunay nga pag-inom og tubig.

Nahugyaw usab ang audience sa opening number sa grand finals sa Sinulog Idol 2015 sanglit milugwa ang mga kanhi idols .

Sa katapusang bahin sa show, nidalit sa hugyaw nila nga song number ang mga kanhi  mananaog sa maong kumpetisyon nga  sila si Jacq Chang, Rachel Faelnar, Ronna Lofranco, Chingkie Maylon ug Claudio Deiparine.

Una na nga gipadayag sa project director sa Sinulog Idol nga si Gloria Villarojo nga dili   lalim ang malakip sa maong contest sanglit kada adlaw ang rehearsal ug matag gabii dunay matagak nga usa ka finalist, hangtud nga unom na lang ang mahibilin ug mao kini nagkumbati og maayo sa grand finals.

Gidumala sa  Cebu City Government, Sinulog Foundation uban usab sa pag-abag sa  Soundtraxxx Production Studio ug Center for Pop ang hugyaw nga Sinulog Idol  nga naa na karon sa ikaunom  ka tuig.