German Moreno nakalabas na ng hospital!

Kahapon ang inaasahan na paglabas ni German Moreno sa St. Luke’s Medical Center Quezon City.

Halos dalawang linggo  na na-confine sa ospital si Kuya Germs dahil sa stroke na nangyari sa kanya noong pangalawang araw ng January 2015.

Certified workaholic si Kuya Germs at ngayon lamang niya mararanasan na magpahinga nang matagal-tagal mula nang magsimula ang kanyang showbiz career. Ganyan katindi ang dedication ni Kuya Germs sa propesyon niya. Literal na walang tulugan si Kuya Germs dahil sa dami ng kanyang mga ginagawa bilang TV host at star builder.

Kara David naibigay ang sulat ng pinakamatandang preso kay Pope Francis

Si Kara David ang ipinadala ng GMA News sa Rome, Italy para mag-cover sa pagbisita ni Pope Francis sa Sri Lanka at sa Pilipinas.

Napanood ko ang report ni Kara na naging emosyonal nang makita niya nang personal si Pope Francis mula sa balcony ng parish church ng Vatican City.

Kitang-kita ang galak sa mukha ni Kara dahil kahit malayo, nasilayan niya ang Santo Papa.

Sa misa para sa mga makakasama ni Pope Francis sa Papal Visit, tuluyan nang bumigay si Kara dahil cry me a river siya.

I’m sure, lalong umapaw sa galak ang puso ni Kara sa face-to-face nila ng Santo Papa sa eroplano na sinakyan nila patungo sa Sri Lanka.

Isa-isang nilapitan, binati at kinausap ni Pope Francis ang mga miyembro ng media na kasama niya at kinabibilangan ni Kara.

Abot-kamay ni Kara ang Santo Papa na nagawa niya na bigyan ng regalo, isang beaded cross na likha ng mga lola na nakakulong sa Women’s Correctional. Naibigay rin ni Kara kay Pope Francis ang sulat ni Lola Petra, ang pinamakatanda na preso sa nasabing kulungan.

Marami ang natuwa at nainggit sa karanasan ni Kara dahil  nagkaroon siya ng pagkakataon na makaharap at makausap si Pope Francis.

Maagap ang TV crew na kasama ni Kara dahil nakunan ng litrato at naipadala agad sa GMA News ang encounter nila ng Santo Papa.

Heart maligayang-maligaya ang puso

Old Hollywood ang theme ng 2nd bridal shower para kay Heart Evangelista noong Lunes sa Fernbrook Gardens, Las Pinas. (Bakit sa story ni Pik 4th bridal shower na? – SVA)

Invited ako sa bridal shower pero hindi ako nagpunta dahil masyadong malayo ang venue. Si Butch Francisco ang naging representative ng Startalk sa bridal shower dahil siya ang nag-interbyu kay Heart.

Ang mga close friend ni Heart na sina Lovi Poe, Alessandra de Rossi at Iza Calzado ang ilan sa mga umapir sa bridal shower na dinaluhan din ng mga executive ng GMA 7.

Siyempre, si Senator Chiz Escudero ang surprise guest sa bridal shower para sa kanyang future wife.
Mga host ng bridal shower sina Tim Yap at Tessa Prieto-Valdes. Naroroon din si Senator Cynthia Villar na good friend ng soon-to-be wed couple.

Kinunan ng Startalk staff ang mga pangyayari sa bridal shower kaya mapapanood ito sa show namin sa darating na Sabado.

Maligayang-maligaya si Heart dahil dumating sa bridal shower ang mga kaibigan at tao na malapit sa puso niya.