The Saint Therese Serenata champion

CEBU, Philippines - Tingog nga  maka-relax sa pamati . Mao kini ang kalidad nga gidalit sa ilado na kaayo nga grupo sa mang-aawit nga Saint Therese Serenata.

Ang maong grupo nga nagbase sa St. Therese of the Child Jesus Parish maoy nahimong champion sa 3rd Sinulog Choral Competition niadtong Biyernes sa gabii diha sa Fuente Osmeña Circle.

Ang conductor sa maong grupo nga si Jurom Natad nibutyag dinhi sa Banat News Hugyaw (BNH) nga todo na ang gibuhat nila nga pagpraktis sukad pa niadtong Disyembre.

Mao kini ang unang higayon nga nisalmot sila og kompetisyon sa usa ka relihiyosong kalihukan.

Nasayran nga ang Sinulog Choral Competition modalit kini sa mga awit nga dunay kalabotan sa balaang bata nga si Señor Sto Niño.

“Wala gyud ko magdahom nga kami ang ma-champion kay nindot gyud ang tanang grupo,” suma pa ni Natad.

Nahimong inspirasyon sa Saint Therese Serenata ang mga karaan nga sakop sa maong grupo nga maoy  nitambag kanila nga dili gyud mahadlok kung mosalmot og kompetisyon.

Dugang pa ni Natad nga usa sa ilang estilo aron dili makulbaan mao nga kinahanglan nga andam gyud kanunay sa dili pa mosaka sa entablado ug hatagan og saktong emosyon ang usa ka kanta.

“Importante pud nga imong i-enjoy ang imong kaugalingon aron dili ka ka-feel og kulba.  Wad-on gyud ang kahadlok kung moapil og contest,” matud pa niya.

Matud pa ni Natad nga importante kaayo ang paghatag og saktong panahon sa pagpraktis sa dili pa sila mo-perform ug ang saktong disiplina ang ilang gipatuman aron magpabilin nga lig-on ang ilang grupo.

Samtang ang nakalangkat sa ikaduhang puwesto mao ang Los Cantantes nga maoy nidaog sa nilabay nga tuig. Naangkon sa Indiana Aerospace University ang ikatulong pwesto.