Señor Santo Niño

Kung unsa kaambongan ang mga imahe ni Señor Santo Niño karong panahona, kana gumikan sa mga manghimo og senina alang sa Balaang Bata.

Si Gemma Sarveda, 53 anyos, usa sa mga karaang manghimoay og senina sa Santo Niño. Matud pa ni Gemma, nakat-unan niya kini sa iyang inahan, nga usa sa mga unang manahiay og bisti ni Santo Niño diha sa Cebu Metropolitan Cathedral.

Gamit ang gibordahan nga mga panapton nga matud ni Gemma gipalit pa nila gikan sa Manila, sukdon niya ang Santo Niño nga iyang ilisanan, ug human niini, hinay-hinay niya’ng isul-ob sa imahe ang nasukod nga puwang panapton.

Ang labing barato nga sinena, alang sa three inches nga imahe, magkantidad og P100, samtang ang kinadak-an (24 inches) mokabat og P3,500 ang bayranan alang sa bag-ong sinena. Ni Gemma pa, magdepende gihapon ang presyo sa desinyo sa bisti ug sa material nga gamiton.

Matud pa ni Gemma, daghan ang magpailis sa Santo Nino kung magsingabot na ang fiesta sa Balaang Bata. Takwahaw lang pud kini’ng mohinay inig kahuman sa pista.

Nagtubo si Gemma uban ang iyang walo ka mga igsuon sulod sa Cathedral diin sila’y tigbantay sa mga buhing baboy ni kanhi Msgr. Tomas Maglasang. Matud pa niya, gibiyaan sila sa iyang papa, ug kay naluoy man kanila ang kura paroko sa maong simbahan, gitabangan sila niini ug gihatagan ang iyang inahan og puhonan para makasugod og paninda og kandila ug maghimo og sinena sa Santo Niño.

Sa dihang gipulihan si Maglasang ug laing pari, nibiya na usab ang pamilya ni Gemma ug nanimuyo sila kilid sa maong simbahan.

Tungod sa kapobre, usa ra sa mga igsuon ni Gemma, ang iyang maguwang nga babaye, ang nakahuman og eskwela isip maestra pinaagi sa tabang ni Maglasang. Ang uban niyang igsuon nahimong photographer sulod sa maong simbahan, samtang si Gemma ug ang iyang igsuon nga si Marcelina maoy nakasunod sa talento sa ilang inahan. Anaa nag-display si Gemma ug ang iyang pamilya sa dalan Jakosalem, luyo nga bahin sa Cathedral.

Pagkakaron, nag-abang og gamay’ng payag si Gemma ug ang iyang pamilya sa Barangay Day-as, Siyudad sa Sugbo. Kada adlaw, makit-an siya, iyang bana ug iyang mga anak (kung way klase) nga nagpintal o nagbisti sa mga imahe. Matud pa ni Gemma, karong panahon nga kusog ang ilang negosyo, ubay-ubay ilang kita, apan kung wala na ang Pista Senyor, mabulit na pud sila sa utang.  

“Kung way Sinulog, mingaw. Mabuhi man hinuon, pero magkautang-utang sad,” matud pa ni Gemma.

Niya pa, inutang ang iyang puhunan, sama sa mga rebolto nga gidisplay, nga kung wala sila’y halin, “absent” lang sa sa datahan.

Apan bisan pa man sa kalisud, ang tulo ka anak ni Gemma nagpadayun pa gihapon sa ilang pagtuon kay matud pa niya kung mahimo, di na siya gusto nga masunod sa iyang mga anak ang kapait sa kinabuhi sa daplin sa karsada. Ang usa third-year college na sa University of the Visayas, samtang ang duha, first year ug third year college sa Cebu Technological University.

Karon naghandum ang karaang mangilisay sa Santo Niño nga hatagan pud sila og higayon nga moilis sa original nga imahe sa Balaang Bata. Apan matud pa ni Gemma, imposible kini kay ang bisti sa Santo Nino sulod sa Basilica, mga mahalon man samtang ang makaya ra niya ang simple nga panapton.

“Nindot unta kay sa dugay na nga panahon, pila na kaha ka libo akong nailisan. Apan lisud man na kay ang mga pari di man mosugot nga baratuhon ang isul-ob ni Santo Niño,” matud pa ni Gemma.

Joie Lyn Star of the Night

Walay gitangtang ang mga hurado nga naglangkob kanila ni Ultimate Celebrity Coach Jay Unchuan, former Pinoy Dream Academy scholar Apple Abarquez ug Banat News Hugyaw (BNH) editor Ryan Mark niadtong Biyernes sa unang gabii sa Sinulog Idol Season 6 diha sa Fuente Osmeña Circle.

Nahukman sa mga hurado nga hatagan una sila og kahigayonan nga mapamatud-an ang ilang potensyal sa pag-awit. Hinuon, gipaabot nga may natagak na kagabii atol sa “Upbeat Night.”

Ang unang performer niadtong Biyernes kinsa niawit og “Stand Up for Love” nga si Joie Lyn Catamora maoy napili nga ‘Star of the Night.