Nash-Alexa movie

CEBU, Philippines - Gumikan sa kakusog sa seryeng Bagito  nila ni Nash Aguas  ug Alexa Ilacad  giingong nakahuna-huna ang Star Cinema nga himuon sila nga bida sa usa ka pelikula. Nasayran nga mainiton nga gihangop sa publiko ang ilang tandem.

Vice ug Coco mag-uban

Nagpanikad na si Vice Ganda sa umaabot niya nga pelikula gumikan kay iyang makauban ang guwapong aktor nga si Coco Martin. Masaligon si Vice nga magmalampuson ang maong pelikula.

Jasmine andam mobalhin

Giangkon ni Jasmine Curtis Smith nga bukas siya sa posibilidad nga motrabaho sa ABS-CBN puhon. Gitataw hinuon ni Jasmine nga dili pa kini mahitabo karong panahona gumikan kay duna pa siya’y naglinya nga mga proyekto sa TV5. “Basta po may trabaho, go!,” suma pa sa aktres.

Rafael mihimakak sa isyu

Gihimakak ni Rafael Rosell ang taho nga matud pa nagbuwag na sila sa iyang girlfriend nga si Olivia Medina.  Suma pa sa aktor nga nag-uban pa sila ni Olivia sa pagsugat sa Bag-ong Tuig ug nibakasyon usab sila dinhi sa Cebu dili pa lang dugay busa imposible kaayo ang maong tsika.

Sinulog Idol 2015  Adunay videoke challenge

Masaksihan na sugod karong gabii ang hugyaw nga Sinulog Idol 2015 nga ipahigayon diha sa Fuente Osmeña Circle.

Moabot ngadto sa 12 ka finalists ang magtigi sa maong kompetisyon ug maproklamar ang champion atol unya sa grand finals karong Enero 15.

Gipaabot nga may usa nga matangtang sa matag gabii nga kompetisyon nga nagtangag og nagkalain-lain nga genre.

Usa sa labing bag-o nga gipuno karong tuiga mao ang “Karaoke Night” kung diin mohulbot og number ang finalists ug wala sila’y ideya sa mapili nila nga kanta. Iplastar dayon kini sa dakong screen ang lyrics sa kanta busa videoke ang peg niini.

Ang Sinulog Idol project director nga si Gloria Villarojo nibutyag nga nikabat sa kapin  90 ang  ni-audition sa maong kompetisyon ug gihashasan kini ngadto sa 40 ug gihimo na kini ngadto  sa 12 ka finalists.

“Ang nakanindot man gud, kay gipaagi gyud og finalists ug daghang mga workshop. Bisan mahuman na ang contest, duna gihapon sila’y makat-onan,“ matud pa ni Villarojo.

Gipaabot na usab ang  komentaryo sa mga hurado nga madungog sa tanan inigkahuman gyud og kanta sa contestant. Ang mga hurado maglangkob nila ni Banat News Hugyaw (BNH) editor ug dyRC program host Ryan Mark; Center for Pop-Cebu branch manager Jay Unchuan ug  former Pinoy Dream Academy scholar Apple Abarquez .

Ang Sinulog Idol matag tuig ubos sa Cebu City Government pinaagi sa Sinulog Foundation Inc. ug gidumala sa Soundtraxx Productions Studio, diin co-presenter ang Center for Pop Music Philippines ug Soundtraxx Productions Studio.

Kung dunay matangtang matag gabii, aduna puy matuboy nga Star of the Night gumikan sa hugyaw nga performance sa usa ka finalist.

Si Sam Costanilla maoy host sa maong kalihukan matag gabii ug magsilbi usab niya nga co-host ang mga nangagi nga “idols”.

Matud pa ni Villarojo nga usa sa atngan sa pagbukas sa Sinulog Idol karong gabhiona  mao ang hugyaw  nga production number kung diin kantahon ang mga sikat nga awit sa tuig 2014.

Ang 12 ka finalists sa Sinulog Idol 2015  Kiery Segayle , Joie Lyn Catamora , Mae Elizabeth Agustin, , Michelle Ann Lagunsad, Kristina Cassandra Dilao, Analyn Manlise,  Mae Faith Viñalon, Stephen Lloyd Abing, Jose Jeffrey Cabrera, Jr., Reynaldo Esmas, Jr., Anthony Rey Reas, ug Charlie Sumalinog.