Dingdong mag-senador?

CEBU, Philippines - Bisan pa man sa pasiatab ni Dingdong Dantes nga dili siya interesado mosulod sa politika apan dunay miulbo nga istorya sa miaging adlaw nga matud pa senador ang daganan sa aktor karong 2016 ubos sa Liberal Party. 

Nawala ang passport

Gikatahong nawala ang passport sa  international R&B singer nga si Chris Brown ug mao kini ang gitumbok nga rason kung nganong wala kini nadayon og tikang sa Pilipinas niadtong December 31, 2014. Ang singer unta  maoy usa sa mo-perform sa New Year countdown sa Philippine Arena.

Pacman hurado sa Ms. U

Ang  Pambansang Kamao nga si Manny Pacquiao maoy usa sa giimbitar aron himoong hurado sa  Ms. Universe 2015 nga himoon sa  Miami, Florida karong January 25.  Giasikaso na karon ni Pacman ang iyang mga schedule aron makatikang sa maong indigay.

Kever sa tsismis

Taudtaud na nga gitsismis ang gender ni  Julie Anne San Jose apan igo lang siya mokatawa kung hisgutan kini. Wala’y ideya si Julie Anne kung unsa ang gibasehan sa istorya nga matud pa usa siya ka tomboy.

Malipayon ra

Gipadayag ni Sheena Halili nga malipayon siya karon sa iyang pagka-single ug dili pa siya interesado nga mosulod og balik sa seryosong relasyon.  Wala pa gyud kauyab og balik si Sheena sukad sila nagbuwag kaniadto ni Rocco Nacino.

ER nasagmuyo

Giingong nasagmuyo si  ER Ejercito gumikan kay wala gyud nanimaho ang pelikula niya nga  Muslim Magnum .357 sa awards night sa Metro Manila Film Festival. Adunay mga obserbasyon nga matud pa hugyaw ang float sa maong pelikula atol sa Parade of Stars apan wala gyud kini napili nga Best Float.

Short vacation

Nilarga dayon paingon sa Japan  si   Kris Aquino ug ang iyang mga anak pagkahuman nila og tambong sa kasal nila ni Dingdong Dantes ug Marian Rivera. Mobalik ra dayon si Kris sa Pilipinas gumikan kay moluhod pa siya og laing kasal sunod adlaw.

Panghinaut ni Derek

Nagpanikad na si  Derek Ramsay sa umaabot niya nga comedy show sa TV5 nga Mac and Chizu ug nanghinaut  siya nga madawat siya sa masa ilabi na nga una niya nga higayon nga mahimong bida sa maong klase nga programa sa telebisyon.

Aljur aktibo sa simbahan

Giingong aktibo na si Aljur Abrenica sa simbahan sukad nagkamingaw ang iyang showbiz career. Nagmalaumon gihapon ang aktor nga mosulbong og balik ang iyang career.

Mikusog og samot

Nagkakusog og samot ang seryeng Forevermore sa ABS-CBN nga gibidahan nila ni  Enrique Gil ug  Liza Soberano.Giangkon  sa duha ka mga bida nga wala sila nagdahom nga mo-click dayon ang labing una nila nga panagpares  sa serye.

John bida sa pelikula

Si  John Arcilla maoy bida sa pelikula nga maghisgot sa kinabuhi ni  General Antonio Luna ug isalida kini sa mga sinehan karong 2015.  Malipayon si John gumikan kay karon pa siya kasuway nga nahimong bida sa pelikula.

Martin nahilom

Taudtaud na nga mipirma og kontrata si Martin del Rosario sa GMA 7 apan wala pa siya mahatagan og  regular  nga teleserye. Ang Rhodora X maoy katapusan niya nga  primetime series  sa iyang mother network.

Giulahi og lantaw

Ang pelikulang  English Only, Please maoy unang gilantaw ni Sarah Geronimo. Ulahi ra niya nga gilantaw ang pelikulang Shake Rattle & Roll XV kung diin nalakip niini ang iyang uyab nga si Matteo Guidecelli.

Christian milupad sa London

Milarga sa London sa miaging adlaw ang  singer-actor nga si Christian Bautista uban sa iyang igsuon nga si Jordan.  Bisitahon ni Christian ang iyang ex-girfriend nga si Rachelle Ann Go  ug ang higala niya nga si  Mark Bautista. Mobalik ang singer sa nasud karong January 15 aron mangandam na og sugod sa umaabot nga concert nila ni  Matt Monro Jr. ug ang grupong  The Platters .

Regalo

Giregalohan ni Marian Rivera og Rolex watch si Dingdong Dantes sa wala pa sila kasla niadtong December 30, 2014. Samtang nag-compose og kanta si Dingdong alang sa aktres.

Andam na

Andam na sila si  Aiza Seguerra ug Liza Diño alang sa espesyal nga seremonya sa ilang panaghigugmaay karong January 8 sa Tagaytay. Kahinumduman nga nagpakasal ang duha sa Amerika sa miaging buwan.

Kris nagpadala og regalo ni AiAi

Nagpadala og regalo nga kuwentas si Kris Aquino ngadto kang AiAi delas Alas. Kahinumduman nga nagtagad na ang duha atol sa kasal nila ni Marian Rivera ug Dingdong Dantes.

Ang maong kuwentas adunay pendant nga hulagway ni Mama Mary.  Nasayran nga usa ka deboto sa birhen ang komedyanteng aktres.

"Talagang pinag-adya ng Diyos ang pagkikita namin dahil nagtampo ako sa kanya December 30 last year yon na namatay ang nanay ko, tapos ngayon, saktong one year na yon at okay na kami," suma pa ni AiAi. 

Album ni Vice gikagubtan

Gihangop pag-ayo sa publiko ang bag-ong album ni Vice Ganda sa Star Records nga nag-ulohan og “#Trending” kung diin pipila sa mga unod niini naghisgot sa pipila ka mga isyu sama sa korupsyon ug “gender inequality”.

Nasayran nga sa unang  semana nga pag-release niini,  nahalinan na kini og 7,500 ka mga kopya ug gipamatud-an kini sa  Philippine Association of the Record Industry, Inc. (PARI).

Pipila sa mga unod niini naglangkob sa  “Ibang Hugis, Ibang Kulay” , “Aba, Matindi”  Boom Panes,” “Malaya Ka Na,” ug “Push Mo’Yan ‘Te”.

Pilipinas nakapuwesto sa Miss Tourism International

Nagmaya ang mga   Pinoy gumikan kay nakaangkon gihapon og puwesto ang pambato sa Pilipinas nga si Glennifer Perido sa Miss Tourism International 2014/15  niadtong December 31 sa gabii didto sa Malaysia.

Si Glennifer maoy napili nga second runner-up (Miss Tourism International Metropolitan)   sa nahisgutang indigay , samtang ang kandidata sa Venezuela nga si Faddya Halaba Troisi maoy nakaangkonsa titulong Miss Tourism International 2014. Samtang ang representante sa Thailand nga si Warangkanang Wutthayakorn maoy  1st runner-up (Miss Tourism Queen of the Year), natuboy usab nga 3rd runner-up (Miss Tourism Global International)  ang pambato sa Netherlands nga si Charina Bartels  ug napili nga 4th runner-up (Miss Tourism Cosmopolitan International) ang kandidata sa China nga si Sun Wen Cong.

Nagikan ang 24 anyos nga si  Glennifer sa   Tabuk City, Kalinga ug usa  kini ka registered nurse.

Kahinumduman nga niadtong 2013, nalangkat sa Sugbuanon nga si  Angeli Dione Gomez ang titulo nga Miss Tourism International. Ang maong titulo nalangkat usab niadtong 2012  sa laing pambato sa Pilipinas nga si Rizzini Alexis Gomez .

Hayley ug Chad magminyo na!

Nakahukom na sila si  Hayley Williams ug Chad Gilbert nga magpakasal na  ug namili na lang sila og petsa alang sa maong butang

Si Hayley  lead singer sa sikat kaayo nga banda nga  Paramore , samtang gitarista usab si  Gilbert sa grupong New Found Glory.

Nasayran nga niadtong Pasko gyud ni-propose si Gilbert  ngadto kang Hayley.

Nagsugod ang panaghigugmaay sa duha niadtong  2008 ug nahitabo kini usa ka tuig human nalandig sa divorce ang kasal ni Gilbert ngadto sa singer nga si Sherri DuPree.

Si Hayley maoy nagpasikat sa awit nga Decode, "That's What You Get” ug uban pa.