Inday Bambina

Baniog na kaayo ang iyang ngalan sa kahanginan sa Kabisay-an ug Mindanao. Ang taga probinsya, nagsunod, nipakpak, ug nidayeg sa katakos niya sa paglingaw sa mga tigpaminaw. Siya walay lain kundili si “Inday Bambina” o Bernardino Eleseo sa tinuod nga kinabuhi.

Bisan pa man sa iyang kasikat ug dili ka bentahaan nga abilidad sa natad sa kalingawan ilabi na sa radyo, pabiling mapaubsanon si Inday Bambina. Sa daghang mga katuigan, gilingaw kita niining 62-anyos nga lumad nga taga Oslob lalawigan sa Sugbo. Anaa na siya sa iyang ika-39 ka tuig nga pag-alagad pinaagi sa kahanginan—hataas nga katuigan niini pinaagi sa dyHP. Kasamtangan siyang nagdumala sa “Bambina Show” ug nalakip usab sa “Kini ang akong Suliran.” Madunggan usab siya isip showbiz reporter sa maong estasyon matag adlaw.

BNH: Nganong Bambina?

Bambina: Mao man na’y gihatag nga radio name sa akong manager kaniadto sa Bombo Radyo. Didto ko gibunyagan as gay reporter mao tong pagbalhin nako sa DYHP gidala nako ang pangalan kay nailhan na man ko sa maong ngan.

BNH: Giunsa nimo pagsugod imong career as radio drama talent?

Bambina: Kaniadtong 1975 ni-audition ko sa DYCB (DYMF na karun) as radio drama talent, pero one week before ko ni-audition, naka audition pud ko sa DYAB pero wala man ko nadawat. Nibalhin ko sa DYCB unya didto ko nadawat as drama talent. All around ang akong trabaho kay nahimo man pud kong reporter. Nibalhin dayun ko sa DYHP nianang 1983 ug didto nako nagdugay hangtod karun.

BNH: Unsa’y rason nganong nagdugay ka?

Bambina: Usa ra jud ang rason katong gisulti sa akong mama: kung makatrabaho ka dili maayo nga mag sige og balhin-balhin kay magsugod kuno ka’s uno. Mao nang wala ko nibalhin pero actually ni retire na ko two years na pero si Attorney Rufil (station manager) di pa man ko papaulion. Aduna na lang koy personality program karun every Sunday ug aduna pud ko’y showbiz report. Extra-extra na lang ko gamay sa drama kay retired na man ko. Unya ok ra man pud nako kay relax na man lang ang akong trabaho.

BNH: Unsa’y nakanindot sa radio drama?

Bambina: Ang mga tawo sa Visayas ug Mindanao mga drama- oriented jud mao nang ang DYHP dili jud wad-on ang drama. Nindot ang drama kung ganahan jud ka mag-artista sa radyo.

BNH: Unsa pu’y nakalisud?

Bambina: Para nako, ang radio drama mao’y pinakalisud. Mas lisud pa siya sa pelikula, sa TV ug stage kay audio ra man siya. So you have to emote jud og maayo harun naay emotions imong tingog kay dili man ka makita. Tarungon jud nimo og hilak ba run harun mura jud ka’g naghilak paminawon sa mga naminaw.

BNH: Unsa’y kasagaran ninyong genre sa drama?

Bambina: Naa mi tanan: comedy, horror, action, love story. Karun aduna na pud mi pangbata, naay pang-ungo pero light lang.

BNH: Naa ba’y kalahian ang drama karun ug sa una?

Bambina: Ang format sa drama sa pagkakaron medyo lahi na kay kung unsay generation karun, ato mang i-adapt. Casual na lang ang conversation karun sa drama sa radyo dili pareha sa una nga imo jung i-exaggerate.

BNH: Unsa’y labing dili nimo malimtan sa imong pagkadramatorgo?

Bambina: My first day katong ni audition ko pagbasa nako sa script kay naa may suwat nga “huh”. Unya ang gipadala sa ako kay devil man unya ang eksena kay giiwagan ko’g rosaryohan. Mao to pakataw-on ko og hahahaha unya pag-abot sa “huh” kay ako ra sang gibasa og “huh” unya sayop man diay kay kinahanglan with emotion kay kunuhay namatay ko.

BNH: Unsa’y labing challenging nimo nga role?

Bambina: Kanang mga kontrabida role. Kanang maldito jud, kanang mamamatay- tao jud ang imong dating kung paminawon ka sa radyo. Kasagarang ipadala sa ako nga character sa DYHP kay kanang mga “Don”, “Drug Lord” kay dako man ko’g tingog. Nakahibaw ko ana tungod kay nahimo kong houseboy sa una sa mga dato, nasweto nako ang tono sa sinultian sa akong mga amo.

BNH: Aduna ba mo’y mga awarding?

Bambina: Katong nahimo kong drama director, kada human sa among episode mupili jud ko’g mga award sama sa best actor, best actress, most respectful ug most behave. Ang ako man gung feeling nga kung mag director ko, mura ko’g maestro. Aduna pud gani ko ato’y Miss Earth award kanang limpyado kay kadtong nahimo kong director, dili man ko ganahan makakita og hugaw sa recording room. Di ko ganahan makakita sa script nga nagkatag-katag.

BNH: Unsa’y imong masulti nga ang mga tawo karun mas hilig na og FM radio kaysa sa AM?

Bambina: Tinuod nga daghan ang maminaw og FM pero daghan man sad gihapun ang padayun nga naminaw sa AM sama niadtong anaa ra sa ilang balay. Sa survey sa among station, kami ang taas og rate sanglit kusog man ang among signal nga madunggan sa Visayas, Mindanao ug ubang parti sa Luzon sama sa Palawan ug Quezon Province.

BNH: Unsa’y mga quality sa usa ka maayo nga drama talent?

1. Kinahanglan maayo jud ka nga mubasa og binisaya harun iapil gihapun ka sa director sa sunod nga drama.

2. Kinahanglan mubasa jud ka sa script before mag- start ang recording harun wala na’y daghang take ug pangutana inig sugod.

3. Kinahanglan mutunga jud ka og sayo inig recording, dili maglate-late kay masuko ang director ug dapat kamao jud ka mutahod sa imong mga katrabaho labi na sa director.

4. Kinahanglan magdala jud ka og ballpen ug papel inig recording harun og aduna ka’y dili masabtan, imo dayun kining isuwat para dili makalimtan.

5. Kinahanglan maayo jud kang mu-emote imong huna-hunaon nga anaa jud ka sa actual nga sitwasyon para ma convince nimo ang mga naminaw.