Pampasuwerte sa Bag-ong Tuig

CEBU, Philippines – Nahuman ang pagsaulog sa Pasko, ug nagpanikad na usab ang katawhan alang sa  pagsugat sa Bag-ong Tuig ug pipila kanato ang padayon nga nagtamod sa mga palihi.

Ang uban wala nanumbaling sa mga patuo-tuo, apan duna gihapo’y mga tawo ang nituman sa mga palihi gumikan kay alang kanila, ” wala’y mawala kanimo kung mutuo ka.”

Nagsagol ang matang sa palihi sa pagsugat sa Bag-ong Tuig ug usa na niini ang pagtigom og 12 ka lingin nga mga prutas gumikan kay mosulod gyud matud pa ang suwerte sa imong kinabuhi.

Samtang ang laing palihi sa pagsugat sa Bag-ong Tuig mao ang pagsul-ob og sapot nga adunay desinyo nga lingin o polka dots aron duna matud pa’y daghang kuwarta nga moabot kanimo.

Dili pud magpalupig ang uban, naandan na usab sa pipila ka mga tawo ang pagpangabli sa tanang pultahan ug bintana alang sa pagpasulod sa suwerte sa ilang panimalay.

Dugang pagpalihi mao ang pagpundo og mga sinsilyo ug uyogon kini inigtungang gabii ug giingong moabot kanimo ang dugang mga kuwarta.

Pipila usab kanato ang magsaba-saba  aron mupalayo ang mga dautang espirito.  Sama na lang sa pagdukdok sa takob sa kaldero o lata.

Bisan sa mga palihi nga nahimong tradisyon sa ubang mga tawo, ang negosyante nga dunay dugong insik nga si Lily Dequito nibutyag nga ang tinuod nga pampasuwerte mao ang pag-ampo .

Nagkanayon si Dequito wala na siya motuo sa mga palihi gumikan nakapunting ra gyud siya sa pagsalig sa Kahitas-an.

“Ang importante nga motabang ka sa imong isigkatawo. Dapat mag-ampo ka ug dapat mobuhat og mga kaayohan sa ubang tawo. Mao kana ang tinuod nga pampasuwerte,” nagkanayon si Dequito.

Samtang ang usa sa mga sakop sa Cebu Clergy Performing Artists nga  si  Fr. Arven Pretila nipadayag usab nga ang pagtuo sa Ginoo maoy tinud-anay nga pampasuwerte.

“Niining Bag-ong Tuig, ato unta kining sugdan pinaagi sa pagpasalamat sa labaw nga makakagahum kung diin atong mapuy-an, mapamatud-an ug mapaambit ang atong pagtuo ngadto kaniya . Ug maninguha pud kita nga magbinantayon  sa panghitabo sa atong palibot,” matud pa ni Pretila.