Bet ng Bayan Grand Finals ngayong Linggo na!
MANILA, Philippines – Matapos sumabak ang mga contestant sa semi-finals showdown, mas mahirap na laban ang kanilang haharapin dahil matinding pasiklaban ng mga talento ang magaganap ngayong Linggo (Disyembre 28) sa Grand Finals Showdown ng pinakamalawak na reality talent search ng Kapuso Network, ang Bet ng Bayan. Gaganapin ito sa SM Mall of Asia, Music Hall kasama pa rin ang hosts na sina Asia’s Songbird Regine Velasquez-Alcasid at Kapuso prime leading man Alden Richards.
Apat na contestants mula sa Luzon, Visayas, Mindanao, at Mega Manila ang maglalaban-laban bawat kategorya. Alamin kung paano sila huhusgahan ng judges na sina Maestro Louie Ocampo, Pop Diva Kuh Ledesma, at Asia’s Nightingale Lani Misalucha.
Para sa Bet sa Kantahan, manaig kaya ang boses ng Pangasinan power belter na si Renz Robosa (Bet ng Luzon)?
Maipagpatuloy naman kaya ni Kierulf King Raboy, ang Bet ng Mindanao, ang naudlot na tagumpay matapos niyang makamit noon ang kampeonato sa Pop Star Kids? Hindi rin dapat palampasin ang malamig na tinig mula sa Bet ng Mega Manila na si Veronica Atienza.
Siguradong mag-iinit ang dance floor sa sagupaan ng mga Bet sa Sayawan. Tiyak na hindi magpapatalo ang Bet ng Luzon na UNEP Dance Club.
Kumakatawan sa Visayas, mapaindak kaya ng grupong Don Juan ang mga manonood? Hindi rin magpapahuli ang Bet ng Mindanao, ang grupong D’Gemini na walang ibang hangad kung hindi gumawa ng pangalan sa larangan ng pagsasayaw. Maging sapat naman kaya ang paghahanda ng A’s Crew (Bet ng Mega Manila) upang patumbahin ang kanilang mga kalaban?
Handa na rin ang mga contestant para sa Bet sa Kakaibang Talento na patunayan ang kanilang galing. Mapabilib kaya ng Bet ng Luzon na si Jason Sobremonte ang mga judge?
Gamit ang galing sa fire dancing, makakamit kaya ni Jomar Abjelina (Bet ng Mindanao) ang hangad na tagumpay? Buwis-buhay stunts naman ang dapat abangan mula sa grupong Techno Jazz, ang Bet ng Mega Manila.
Sabay-sabay kilalanin ang mga tatanghaling Bet ng Bayan ngayong Linggo pagkatapos ng Kapuso Mo, Jessica Soho sa GMA.
- Latest
