Isabelle Daza umaabot nga action star

CEBU, Philippines - Hingpit na nga nausab ang imahe ni Isabelle Daza gumikan kay  gawas nga nailhan siya sa kadaghanan  isip  TV host,  nabatyagan na usab siya sa katawhan isip maayo nga aktres.

Gipasalig ni Isabelle nga masaksihan ang kalamboan sa iyang pag-arte sa  unang pelikula niya sa Metro Manila Film Festival (MMFF) nga  Kubot: The Aswang Chronicles 2.

Suma pa sa aktres nga wala gyud niya igsapayan ang iyang kahago sa maong pelikula gumikan kay maayo gyud ang pagkabuhat niini.

“Excited po ako, dahil first time ko na maka-join sa parade (parade of stars),” hirit pa sa aktres sa dihang nahinabi sa Cebu Entertainment Group (E-Group) dili pa lang dugay dinhi sa Sugbo.

Suma pa sa aktres nga natuman gyud ang iyang pangandoy nga makasuway og aksyon nga mga eksena.

“Meron po akong action scenes sa pelikula. Noon ko pa sinasabi na gusto ko maging action star.  Sulit po ang pagod na ibinuhos ko sa pelikulang ito,” matud pa ni Isabelle.

Suma pa ni Isabelle siya ra mismo ang nihimo sa iyang mga stunts, gumikan kay nakaya ra man usab niya. Lahi matud pa nga Isabelle ang masaksihan sa publiko dinhi gumikan kay buot matud pa sa ilang direktor nga si Erik Matti nga susama siya og lihok ni Angelina Jolie nga “astig” gyud ug dili sexy ang resulta.

Dili makalimtan ni Isabelle ang eksena niya sa Kubot, siya ra gyud ang nikatkat og building, ug dihang nahibaw-an kini sa iyang inahan, nahugyaw matud pa kini.

Malipayon usab ang aktres gumikan kay katrabaho niya ang usa sa mga lig-ong aktor karon sa showbiz nga si Dingdong Dantes.

“Kahit naman sinong aktres, malaki talagang bagay kung makatrabaho mo ang isang malaking artista katulad ni Dingdong.  Ang galing talaga niya umarte, “dugang pa ni Isabelle.

Bisan pa man sa maayong dagan sa iyang career, magpabilin gihapon niya nga career consultant ang iyang inahan nga si 1969 Miss Universe Gloria Diaz.

“Sobrang  saya ni mommy sa career ko , kung tingin niya hindi maganda yung performance ko,  sasabihan talaga ako nun,” say pa ni Isabelle.

Samtang plano ni Isabelle nga dad-on sa France ang iyang pamilya aron magbakasyon karong Pasko.

Dili na bag-o kang Isabelle kung dunay mangutana kaniya  kung interesado ba siya mosalmot og indigay sa kaanyag.

“Marami pa namang ibang babae diyan, seguro hindi ako para sa ganyan,” suma pa ni Isabelle.

Suma pa ni Isabelle competitive siya nga pagkabaye, dili matud pa siya muatras og mga hagit. Apan para kaniya dili niya kinahanglang makigtigi aron lamang mamahimo siyang labing maanyag nga babaye.

Sa pikas bahin, nasaksihan na kaniadto ang pag-arte ni Isabelle pinaagi sa  romantic-comedy movie  nga “It Takes A Man and A Woman” nga gibidahan nila ni  John Lloyd Cruz ug Sarah Geronimo.

Malipayon si Isabelle gumikan kay gikan sa sosyal nga imahe, anam-anam na siya karon nga nadawat sa masa.

“Sobrang nakakataba ng puso na tinanggap nila ako. Nakakatulong talaga ang Eat Bulaga sa akin para mapansin ako ng masa,” matud pa sa aktres.

Nasayran nga kung duna siya’y libreng oras, mogahin gyud siya og oras sa paghatag og libreng tutorial kang Ryzza Mae Dizon ug mahitabo kini kasagaran matag weekend.

Kanhi maestra si Isabelle busa dali ra siya makasabot sa nagkadaiyang batasan sa bata.

Pipila sa mga gitudlo ni Isabelle kang Ryzza mao ang Social Studies, English ug Science. Nasayran nga duha ang iyang degree: Early Child Development ug Human Biology.

Suma pa niya, libre ang iyang pagtudlo kang Ryzza sanglit nakita niya nga nanginahanglan niini ang sikat na kaayo nga child wonder. Mapasigarbuhon siya nga makamao na mutabi og English si Ryzza.

Kung wala’y lingaw si Isabelle ang pagtambay ra gyud sa ilang balay maoy iyang naandan.

“Nasa bahay lang ako, magbabasa ng libro  o kaya manood ng movies kapag wala akong ginagawa,’ suma pa sa aktres.