Nahulihan ng shabu dating bold actor na si Anton Bernardo hindi pa rin nakakalabas ng kulungan; Dingdong at Marian may prenup agreement?!

PIK: Ikinuwento namin kay Isabelle Daza sa presscon ng Kubot: The Aswang Chronicles na halatang miss na miss siya ni Ryzza Mae Dizon.

Kapag nababanggit ang pangalang Belle, napapabuntung-hininga si Ryzza Mae dahil sobrang close pala ito sa dating Dabarkads sa Eat Bulaga.

Si Isabelle pala ang tutor ni Ryzza Mae at minsan ay tinutulungan itong gumawa ng homework niya.

Kahit umalis na si Isabelle sa Eat Bulaga, tuloy pa rin daw ang pagtu-tutor niya kay Ryzza Mae. Hindi na nga lang madalas dahil iba na ang sche­dule ni Isabelle ngayong nasa ABS-CBN 2 na ito.

PAK: Hindi pa raw pinag-usapan nina Dingdong Dantes at Marian Rivera ang isyu ng prenup agreement dahil may ilang mga showbiz couples na rin na magpapakasal na agree sa ganung set-up.

Sabi lang ng bida ng Kubot: “Ayaw kong magbigay ng opinyon ko muna diyan dahil siyempre, if I say my opinion it’s like stating already kung ano ang magiging gusto ko sa set-up namin.”

Dagdag pang pahayag ni Dingdong: “Since it’s a delicate matter, kailangan talagang pag-isipan nang husto ‘yan.

“Kami naman we’re open to talk about anything, ang mahalaga sa amin… kasi bilang Pilipino alam natin na we’re shy mostly to talk about money. Pero kinakailangan maging klaro ang mga bagay na ganito. Hindi magiging hadlang sa aming communication.”

BOOM: As of presstime ay naka-detain pa rin ang dating bold actor na si Anton Bernardo sa may Camp Panopio dahil sa nahulihan itong may dalang isang sachet na shabu at paraphernalia.

Nahulihan lang si Anton ng checkpoint na walang suot na helmet sakay sa kanyang motor. Pero naghinala sa kanya ang mga pulis dahil sa kakaibang kilos nito, kaya kinapkapan nila ito nang husto at tiningnan ang dalang gamit at doon nga nakitang may dala itong shabu at paraphernalia.

Kaya ikinulong ng mga pulis. Pero ipinagtataka lang nila bakit wala man lang daw nagpiyansa sa kanya.

Sinubukan ng Startalk na interbyuhin ito pero nagtago ang aktor at hindi ito nagpakita sa mga gustong mag-interview sa kanya.