QueenSize of Cebu 2014 moabot na, libreng ticket ipanghatag

CEBU, Philippines - Kinsa sa 15 ka mga maanyag, talentado, ug utokan nga plus-size transgender ang makasakmit sa usa sa lima ka korona: QueenSize of Cebu - World Festival 2014 (winner); QueenSize Festival - Pacific Islands (first runner-up); QueenSize Festival - Caribbean Islands (second runner-up); QueenSize Festival - Mediterranean Islands (third runner-up); ug QueenSize Festival - Arctic Islands (fourth runner-up)? Sulod sa tulo ka buwan nga pagpangandam, koronahan na karong Sabado, Nobiyembre 8, diha sa The Stage E-Mall ang mga mananaug.

Gipaabot nga moukay ug mohugyaw sa mga manan-away ang mga kandidata sul-ob ang mabulukong festival costumes nga nagrepresentar sa mga sikat nga festival sa tibuok kalibutan.  Adunay libreng ticket nga ipanghatag ang MoonWalk Cebu, tagdumala sa QueenSize, ngadto sa mga fans nga makahatag sa labing nindot ug talagsaong pangutana nga tubagon sa Top 7 alang sa ilang final question and answer. I-like lang ang Facebook fanpage sa QueenSize of Cebu ug i-post ang pangutana. Gidapit ang tanan sa pagsuporta ug pagtan-aw sa mga kandidata alang sa katumanan sa ilang damgo nga mahimong rayna bisan pa man sa ilang gidak-on.

Gawas kang QueenSize of Cebu - Universe 2013 Marva Brida Reigner ug iyang runners-up, mohatag usab og dugang bulok sa koronasyon ang QueenSize Divas, Power Trio, ug Cebu's Hot Men. Pagadumalaun ang maong pasundayag nila ni Cyrus Velasco ug Junmark Villegas. Mapalit ang pageant tickets sa tag P700 (VIP), P500 (diamond), ug P300 (general admission). Text sa 09103052328 / 09322014276 o bisitaha ang QueenSize of Cebu fanpage alang sa dugang kasayoran.

Garbo sa Sugbo Pambato sa Miss Supranational

Usa ka registered nurse si Felina ug usa siya sa nagdumala sa negosyo sa iyang pamilya dinhi sa Sugbo.

Dili na bag-o alang kang Felina ang pagsalmot og mga indigay gumikan kay nakasalmot na siya niadto og mga indigay sama sa Miss Sogod didto sa Leyte,  Miss China Town  ug sa  Miss Chinese Cosmos Southeast Asia 2013 nga gipahigayon didto sa Korea.

Giandam na ni Felina ang iyang kaugalingon sa komento sa ubang tawo nga wala makauyon sa report nga duha ka indigay alang sa titulo nga Miss Supranational nga mahitabo karong tuiga.

Nasayran nga  si Yvette Santiago maoy representante pud sa Pilipinas alang sa laing Miss Supranational 2014 nga himuon didto sa Poland.

Kahinumduman nga nabungkag ang grupo nga nag-organize sa Miss Supranational busa duha ka managsama nga indigay ang mahitabo niini karong tuiga.

" Andam na gyud ko anang butanga, nga dunay uban moingon nga peke daw ko, dili lang seguro ko magpaapekto sa mga istorya. Dapat lang seguro ta ma-proud nga dunay representative ang Pilipinas sa duha ka Miss Supranational. Ako lang gyud buhaton ang akong best sa pag-apil nako ani nga contest," suma pa ni Felina.

   Target unta ni Felina nga mosalmot og Miss Cebu apan wala siya katambong sa screening karong tuiga gumikan sa iyang ka-busy apan iyang paningkamotan nga makasalmot sa umaabot nga mga tuig sa nahisgutan nga indigay.  (Sanden J. Anadia)

24 Oras Central Visayas karong Lunes na!

Mao na kini ang bag-ong ngalan sa local news program sa GMA7-Cebu sugod karong Lunes, November 10. Gumikan niini, mas halapad ug mas lig-on na nga pagbalita ang masaksihan sa mga bisaya, sanglit mahiusa na ang nahisgutang news program sa award-winning "franchise" sa GMA Network.

Pinaagi sa 24 Oras Central Visayas, mas maayo nga pagbalita ang paambitan, kaluhaan usab sa modernong teknolohiya sa paghagpat og mga balita, aron mas mapakita pa ang mga hiyas nga tatak Sugbuanon.

 Haom kaayo kining maong kalambuan sanglit nagsingabot na usab ang Sinulog festival.

Dungan sa pagsubang sa 24 Oras Central Visayas mao usab ang pagbag-o niini og dagway.

Suma pa nga gitumong ang maong kabag-ohan agi’g pagpalig-on sa baruganan sa network nga mao ang "enriching the lives of Filipino ... with the responsible delivery of News and Information."

Dinuyugan usab kini sa talagsaon nga "Kapuso Core Values of placing God above all, Believing the viewer is Boss, of upholding Integrity and Transparency and driven with passion for Excellence."

Dungan niini, nasayran nga ang tanang banner newscast sa GMA7 sa nagkadaiyang lalawigan sa nasud magdala na sa ngalan nga 24 Oras.  Saksihi ang paglugwa sa 24 Oras Central Visayas sugod karong Lunes sa hapon.