Lig-ong relasyon

CEBU, Philippines - Gipadayag ni Bea Alonzo nga normal lang sa mag-uyab nga maglalis usahay. Suma pa sa aktres nga dili gyud niya padak-on kung mag-away sila sa iyang boyfriend nga si Zanjoe Marudo ug mao kini ang rason nga pabilin silang lig-on hangtud karon.

Layo sa usa’g-usa

Ang mga staff mismo ang nangita og paagi nga ilayo ang distansya sa tagsa-tagsa ka dressing room nila ni Marian Rivera ug Carla Abellana sa set sa sitcom nga Ismol Family. Si Marian maoy special guest sa maong sitcom. Kahinumduman nga hilaw ang tinagdan sa duha sukad pa niadto.

Gamay ra ang mga artista

Gibutyag ni Yeng Constantino nga gamay lang nga mga artista ang iyang giimbitar sa umaabot nga kasal nila ni Victor Asuncion."Sa entourage ko po, kasama ko po 'yung mga best friend ko, mga kabanda ko po rati at mga kaibigan ko from church," nagkanayon si Yeng.

Kim andam na morampa

 Andam na si Kim Rodriguez nga mosalmot og beauty contest ug usa kini sa rason nga gimintinar niya ang iyang sexy nga lawas.  Wala pa hinuon gidetalye sa aktres kung unsa nga indigay ang una niya nga salmotan.

Nataypan si Anne

Dakong garbo alang kang Anne Curtis nga dunay mga ilado nga personalidad nga nagpahulagway kaniya atol sa red carpet premiere sa pelikulang "Blood Ransom", niadtong Martes sa gabii didto sa ArcLight Cinema sa Amerika. Nagpahulagway kaniya sila si Jessica Sanchez ug Kobe Paras.

"A Family Story" ni Richard ug Dawn

Subling magpares sa usa ka teleserye sila si Dawn Zulueta ug Richard Gomez, pinaagi sa "A Family Story" nga gitakdang mulugwa sa ABS-CBN sunod tuig.

Ang Star Creatives, TV production arm sa Star Cinema maoy mugama niini, diin si Jerry Sineneng maoy mudirek.

Kun walay kausaban, malakip usab sa cast sa "A Family Story" sila si Jessy Mendiola, JC De Vera, Sam Concepcion, Assunta De Rossi, Tonton Guttierez, Minnie Aguilar ug Brian Santos.

Napanlantawan nga hugyaw matud pa ang "A Family Story" gumikan kay ang Star Creatives man ang mugunit niini, sama usab sa laing production sa maong unit, ang 'Forevermore" nga nagsugod na niadtong Lunes sa ABS-CBN primetime.

Gipahigayon na ang story conference sa maong proyekto niadtong nilabay nga adlaw.

Iya balik Kapuso na!

Hingpit na nga nahibalik sa nataran sa GMA7 si Iya Villania-Arrellano human siya nipirma og kontrata sa GMA Network mga 50 ka minutos pa ang nakalabay.

Kahinumduman nga unang nailhan sa publiko si Iya pinaagi sa youth-oriented show sa GMA7 nga "Click" niadtong 2003.

Suma pa ni Iya, atol sa contract signing kagahapon sa hapon: "It's nice to be back."

"We welcome her with open arms," nagkanayon usab si Entertainment TV group SVP Ms. Lilybeth Rasonable.

Si Iya, naminyo ngadto sa TV host nga si Drew Arrellano sa nilabay nga tuig.

Nora hukman sa Australia

  Nominado si Nora Aunor  sa Best Actress Category sa umaabot nga  Asia Pacific Screen Awards gumikan sa maayong pagdala niya sa indie film nga Hustisya.  Ipahigayon sa  Brisbane, Australia karong  December 11 ang awards night sa Asia Pacific Screen Awards.

Komportable si Jolens

Gipadayag ni Jolina Magdangal nga komportable ra siya sa seryeng Flordeliza sa ABS-CBN gumikan kay nakatrabaho na niya niadto ang direktor niini nga si Wenn Deramas. Nakauban sa  aktres  si Direk Wenn sa pelikulang Kung Ikaw Ay Isang Panaginip sa Star Cinema.

Jaclyn nagdoble ang proyekto

 Kaduha malantawan  sa GMA-7  si Jaclyn Jose matag Lunes hangtud sa Biyernes sa gabii gumikan kay  gawas sa Ilustrado, nalakip usab ang aktres sa seryeng More Than Words. Mapasalamaton si Jaclyn sa Kapuso Network gumikan kay nagdoble gyud ang  iyang proyekto.

Sikat sa Singapore

Gikatahong sikat kaayo didto sa Singapore ang reality show nga It Takes Gutz to be a Gutierrez. Gi-feature usab sa nagkadaiyang mantalaan sa maong dapit ang pamilyang Gutierrez.

Dabarkads motikang sa HK

Motikang ugma sa Hongkong ang grupo sa Eat Bulaga aron mohatag og libreng kalingawan sa mga Pinoy sa maong dapit. Mahibalik sa Pilipinas ang Dabarkads  karong Lunes.

Rebelasyon

Giangkon sa Kapamilya star nga si Empress Schuck nga gipaubos niya  sa  cosmetic surgery ang ubang parti sa iyang lawas. Mao lang kini nahuna-hunaan sa aktres aron  makabaton og sexy body figure.

Dako og posibilidad

Nagkasuod og maayo ang mga bida sa pelikulang  Edsa Woolworth  nga sila si Pokwang ug ang American actor nga si Lee O'Brien. Bukas si Pokwang sa posibilidad nga magkauyab silang duha. 

Gigastohan og dako

Moabot ngadto sa US$22 million ang budget sa Hollywood biofilm ni Arnel Pineda. Suma pa nga hugyaw ang pagama sa maong proyekto busa angayan kini atngan sa iyang fans.

Higala ra kutob

Tsika pa ni Raymart Santiago nga okay ra kaniya nga mahibalik ang panaghigalaay nila ni Claudine Barretto apan imposibli na matud pa nga mahiusa pa sila pag-usab isip usa ka pamilya.

Picture Picture gipasidunggan

Gipasidunggan sa U.S. International Film and Video Festival ang programang Picture Picture ni Ryan Agoncillo sa GMA-7. Gitunolan kini og Certificate of Creative Excellence.

Myrtle mi-pose sa FHM

Ang  "Pinoy Big Brother" (PBB) 2012  winner ug  cosplayer  nga Myrtle Sarrosa nisuway na gyud og daring costume  pinaagi sa November 2014 issue sa FHM.

Pormal na nga gipaila si Myrtle isip cover girl sa bag-ohay  lang nga 2014 Halloween Ball  nga gipahigayon sa Raven,  Bonifacio Global City.  Gisul-ob sa 19 anyos nga aktres ang itom nga bra, gloves ug  tiger-print headwear .

Sikat ang pangalan ni Myrtle sa local cosplay community gumikan sa hugyaw niya nga mga  costume ug nisamot pa gyud kini sa dihang nisalmot siya sa PBB.

  Nakalugwa na usab siya sa pipila ka mga serye sa ABS-CBN niadto, kini sama sa “Kahit Puso'y Masugatan" ug "Moon of Desire."

Concert ni Mariah nagmalampuson

  Gidumogan sa liboan ka mga tawo ang concert sa pop diva nga si Mariah Carey niadtong Martes sa gabii sa Mall of Asia Arena ug gikatahong nagbaha ang local stars gikan sa nagkadaiyang istasyon nga nilantaw niini.

Human sa maong concert dinhi sa Pilipinas, mideretso na si Mariah sa Thailand nga maoy motak-op sa iyang Asian Tour.

Sa unang bahin sa concert, gikanta ni Mariah ang sikat kaayo niya nga mga awit sama sa  "Fantasy," "Touch My Body," Emotions" ug  "Shake It Off.

"It's so good to be here tonight.  I'm giving you a hug right now.  Thank you guys," suma pa ni Mariah.

Wala mayabag ang tingog ni Mariah sukwahi sa nahauna niyang mga concert sa laing nasud. Human sa iyang mubo nga mensahe, gikanta dayon niya ang "Hero", "Always Be My Baby" , "Thirsty" ug  "Meteorite."

Unang misikat si Mariah niadtong 1990 pinaagi sa iyang self titled album nga gisundan sa laing album nga nag-ulohan og  Emotions niadtong 1991 ug  Music Box niadtong 1993. (BANAT NEWS)