Hugyawnatic

Dear Banat Hugyaw,

Hello diay sa tanang mga suki sa Banat News, ako diay si Mae , 32 anyos na ko ug nagpuyo sa Mandaue City.

Minyo na ko ug  aduna ko'y duha ka mga anak . Ako lang ipaambit ang love story namo sa akong bana nga si Vince. Pareha ra mi og edad , mao seguro nga magkasinabot mi dayon. Nag-edad pa lang mi niadto og 24 anyos sa dihang nagkaila mi.  Adunay gipahigayon kalingawan sa among baryo kay hapit na man tu ang pista ug nanan-aw mi uban sa akong barkada.

Dapit sa among nahimutangan ang laing grupo sa mga lalaki nga nilantaw pud sa kalingawan.  Nabantayan nako ang usa ka lalaki nga sige lang og pasiplat nako, magsige siya og tan-aw, seguro nataypan ko niya, haha.

Dili gyud mahimutang ang iyang mata, masakpan ra ba gyud nako nga mokawat siya og tan-aw nako, kung sa tagalog pa, "pasulyap-sulyap" ang gibuhat niya nako.

Guwapo pud baya siya, pero wala ra gyud ko, kay abi pa lang easy girl ko nga pagkatawo.

Nahuman na lang ang kalingawan, kutob ra gyud siya sa pagtan-aw nako, laktod pagkasulti, wala siya makahigayon og duol kanako aron makig-ila ila.

Seguro, mauwaw lang gyud siya, pero okay ra baya unta nako, kay cute man gyud siya. Ako makomparar ang iyang panagway kang Alfred Vargas, haha, moreno gyud siya. Pagkasunod adlaw,nilaag ko sa piryahan sa among dapit ug niduwa ko og color game. Wala ko kabantay, naa man diay siya sa akong tupad ug niduwa pud siya og color game.

Dili ko kalimot sa iyang dagway, kay hitsuraan pud baya, hahaha. Samtang nagduwa mi og color game, mao gihapon iyang gibuhat, " pasulyap-sulyap" na pud.

Hilig kaayo siya og pasulyap-sulyap apan naabot ang oras nga nahutdan nako og kuwarta busa kinahanglan na nga moundang na ko sa color game, puwes milakaw ko.

Nakugang na lang ko kay nisunod bitaw siya ug nisangpit siya nako pinaagi sa pag-ingon og, "Miss , puwede makig-ila ila? Sensya kaayo ha, wala na lang gyud ko makaantos sa imong kaguwapa".

Murag nitaas og samot akong buhok niadtong higayona tungod sa iyang gisulti. Nangayo siya sa akong number.  Sukad niadto, magtext-text name uy, hahaha.  Siyempre, gikilig ko gamay, cute man gud siya.

Naabot ang panahon nga nagkasuod mi og maayo ug kanunay name nga mag-date, kilig much!

Angkunon ko, nagkadugay ang among kasuod, ne-develop na pud ko niya, ug niangkon pud siya nga ganahan pud siya nako.    Dili ko kalimot, February 14 gyud ko niya gipangayuban, ako dayon siya gisugot. Dugay na pud baya ko nagpaabot nga iya kung panguyaban. Lain man sad paminawon kung ako ang manguyab kaniya.

Nagkasinabot mi og maayo, ug panagsa ra gyud mi maglalis. Kung mag-away man gani, gamay ra gyud kaayo ang rason. Human sa tulo ka tuig , nakahukom mi nga magminyo, unsa pa man ang dugayan, dili ko ganahan nga mailog pa siya sa lain.

Kung maghuna-huna ko sa among kaagi, nagsugod ra gyud ang among panagtagbo gumikan sa "pasulyap-pasulyap".   Mo-request na lang ko sa lyrics sa kanta ni Tootsie Guevara nga Pasulyap-sulyap.

Hi Mae! Paabuta ugma puhon ang lyrics nga imong gi-request. Daghang salamat sa imong love story nga gi-share. Kamo HUGYAWnatics, aduna ba kamoy LOVE STORY? I-share pinaagi sa email: [email protected] o sa facebook: [email protected]