Regine makiki-join sa Masskara Festival

MANILA, Philippines - Walang pagod ang paghahanap para sa susunod na hahangaan ng sambayanan dahil ang Kapuso reality-talent search na Bet ng Bayan, isasabay ang Western Visayas regional showdown nito sa isa sa pinaka-bonggang kapistahan sa Pilipinas—ang Masskara Festival ng Bacolod!

Makikisaya sa pagdiriwang ng buong siyudad ang nag-iisang Asia’s Songbird na si Regine Velasquez-Alcasid, na sa una niyang pagbisita sa Bacolod ngayong taon, ay inaasahang bibirit para sa kanyang Bacoleño fans. Sasamahan siya ng kanyang Bet ng Bayan co-host at Ilustrado lead character na si Alden Richards sa nasabing regional showdown na magaganap ngayong Sabado, October 18, sa Bacolod City People’s House (dating New Government Center) sa ganap na 7PM.

Bawat contestant naman ay umaasang mapabilib ang board of judges na binubuo ng Pop Diva na si Kuh Ledesma, ang sikat na composer at arranger na si Louie Ocampo, at ang Bacoleñong Eat Bulaga dabarkads na si Allan K.

Di rin naman magpapahuli ang mga bida mula sa GMA Telebabad series na Strawberry Lane at Hiram na Alaala na darayo rin sa Masskara.

Sa Biyernes, October 17, ang love team na JaBea o Jake Vargas at Bea Binene, kasama sina Kim Rodriguez, Sunshine Dizon at Sheryl Cruz ay mapapanood sa Main Atrium ng SM City Bacolod sa isang Kapuso Mall Show na magsisimula ng 4:00 PM. Ang pinaka-aabangang Dansskara Finals naman ay mapapanood sa Bacolod Public Plaza pagpatak ng 7PM.

Samantala, makiki-party sina Kris Bernal, Rocco Nacino, at Lauren Young ng Hiram na Alaala sa isang Kapuso Meet and Greet sa ganap na 10:30PM na agad susundan ng Charter Day Countdown sa People’s House.

 Ang highlights ng pakikisaya ng GMA sa Masskara Festival ay mapapanood sa Let’s Fiesta! sa October 26 na eere sa lahat ng GMA regional stations sa Ilocos, Bicol, Dagupan, Cebu, Iloilo, Bacolod, Davao, GenSan, at Cagayan de Oro.