Uno, Dos, Tres, Biyahe na!

Hello mga suking readers sa  Banat News! Alang sa mga estudyante, murag nanimaho naman ang sem break o ba kaha nagkaduol na pud ang Pasko.

 Busa mga Iyeers, klaro na kaayo sa pattern nga dunay pipila kanato ang nagplano na nga mobakasyon aron magpa-relax. Para maandam kita aning umaabot nga gitawag nato og 'travel season' sa katapusang bahin sa tuig, ania ko'y i-share kaninyo nga mga nakat-onan nako nga Top 6 travel tips:

1.Travel Documents. Mao ni ang number one priority nimo, ang imohang mga dukomento sa pagbyahe. Apil niini imuhang ticket, IDs, ug pasaporte para sa mga mubyahe abroad. Dapat nakabutang ni sa imong 'hand-carry bag' o kanang bag na imong bitbiton pirme. Isulod kini  dapit sa bag nga dali ra nimo makuha ug ilahi daan para dili na ka mahasol og ukay kung ting-inspeksyon na .

2. Sinina.

Hinumdumi, dad-a lamang katong mga angay nimong dad-unon ug dili ang tibuok drawer nimo kay hasol kaayo magdala og daghang gamit nga wala ra pu'y pulos sa imong pagbyahe. Kanang sinina nga komportable ka. Importante gyud kaayo para nako ang 'light traveling' o gaan nga pagbyahe kay dali ra kaayo ang paglihok-lihok.

3.Cash.

Siyempre unsaon nimo pagbyahe og wala kay plete. Importante nga magdala ka og cash daan nga igo-igo ra sab sa panggasto nimo samtang nagbyahe. Pasobrai lang bisan gamay aron dili makuwangan kung duna ka'y kalitkalit nga paliton.

4.Toiletries.

Naglangkob kini sa mga sabon, shampoo, toothbrush, toothpaste ug uban pa. Kung mahimo gani, adto na lang pagpalit ani tanan inig abot sa imong adtoan aron dili kaayo bug-at sa imong bag.

5.Medisina.

Kung aduna gani kay mga tambal nga gimintinar, importante pud nga dili nimo kini kalimtan. Maayo sad nga mag-andam ka daan og mga tambal nga magamit nimo sa biyahe ingkaso lang, sama sa paracetamol para labad sa ulo, ug ingon man usab tambal sa constipation ug LBM.  Pagdala sab og tambal kontra sa lipong sa biyahe ilabi na og dali ra kang dagaton. Pag-inom ani usa ka oras sa dili pa mobiyahe.

6. Pagkaon. 

Kalit ka nga gutumon samtang nagsakay og  bus o ba kaha eroplano, mas maayo nga magdala ka daan  og biskwet o pan gumikan kay dali ra man kini masulod sa bag.

(Madungog si DJ Rocky sa 93.9 iFM, sa programang iSHARE, Lunes hangtud Sabado, 9pm-12mn)