Inanay nga kalampusan ni Teej

CEBU, Philippines - Nagsugod na og katkat sa hagdanan paingon sa kalampusan, partikular na sa hingpit nga pagsulod sa showbiz world.

Ang produkto sa Sinulog Idol sa Sugbo nga si Teej Rosales nagsugod na karon isip trainee sa Star Magic ug dako ang iyang panghinaut nga makabaton siya og luna sa target niya nga mahimong artista.

Natapos niya ang kursong Bachelor of Science in Marine Transportation sa University of Cebu.

Nailhan siya isip mapaubsanon ug mahigalaon ug usa kini sa hiyas nga iyang ipasigarbo ngadto sa ubang mga tawo.

Nailhan si Teej sa mga Sugbuanon sa dihang nisalmot siya sa Sinulog Idol 2013 ug nahimo usab siya nga visible sa nagkadaiyang kalihukan sa Sugbo pinaagi sa paghalad niya og awit.

"Malipayon kaayo kay daghang nahitabo nindot  sa akong life. Ang Sinulog Idol jud ang naghimo sa akong journey kay daghan ko'g na-achieve nga wala nako gi-expect like nanaghan akong shows, mas nailhan ko ug daghan jud nga opportunities ang niabot;”  saysay pa ni Teej.

Sa pagsulod niya sa showbiz, magamit gyud niya ang iyang nakat-onan sa pagsalmot niya og Sinulog Idol ug usa na niini ang pagpabaga sa iyang nawong, ug dili angayan makulbaan kung kaatubang ang daghang tawo.

"Katong nasulod nako sa official top 12 "the call back" kay proud kaayo ko sa ako self nga sa kadaghan ni audition, usa ko sa napili. Nindot kaayo balikan ang maong mga adlaw kay wala gyud ko ka feel og competition kay nasuod na man gud nako ang kauban nako nga finalists. Gilingaw ra gyud nako ang akong kaugalingon," dugang pa niya.

Nagkanayon si Teej nga mahiligon gyud siya sa pagpaminaw og music sukad pa niadto ug dinhi siya nagsugod og kuha og ideya sa estilo sa pagkanta.

"Bata pa lang ko, ganahan na gyud ko maminaw og music, musabay jud ko og kanta labi na makadungog ko sa ako favorite songs sa radio unya daghan muingon  nako nga arang-arangan daw ko og tingog, hahaha. Wala ra gud ko ga-mind sa ilang reaksyon, kay ang ako lang nga malingaw ra ko kung maminaw og music," suma pa ni Teej.

Idolo ni Teej si John Lloyd Cruz gumikan kay matud pa, buotan kaayo kini nga artista ug maayo pa gyud moarte.

Nahimong front act artist si Teej sa nagkadaiya nga mga out of town show sa mga artista sama  nila ni Xian Lim, Khalil Ramos, Neil Coleta, Bryan Termulo, Aicho, Abra, Saicy, Luningning, Marcelito Pomoy, Liza Soberano ug daghan pa.