Rommel Tuico in A Dozon

CEBU, Philippines - Human sa iyang "Dili Tanan" nga labihan ka sikat sa nilabay nga tuig, ilabi na panahon sa piniliay, gisundan kini niya og "Halos Tanan," nga inanay na usab nga gihangop og maayo sa publiko. Ang "Halos Tanan", maoy bali nga bersyon sa "Dili Tanan."

Ang pasiunang mga linya sa labing bag-ong kanta ni Rommel Tuico mao kini: Halos tanang guwapo bayot

Halos tanang bayot guwapo

Dunay uban wa pay seguro

Kay ilang dagway wa man pu'y klaro

Halos tanang guwapa retokada

Halos tanang retokada guwapa

Busa migo ayaw gayo'g kompyansa

Basig uyab nimo macho sa una

Apan hangtud karon, padayon gihapon nga makalingaw sa publiko ang "Dili Tanan", ang awit nga subling nagtisuk kang Rommel sa panumduman sa mga bisaya nga mahigugmaon og musika. Kini human usab siya nanimpalad sa gawas sa nasud, isip singer. Sa SM niining bag-o lamang, gipakpakan gihapon og maayo ang awit niya nga "Dili Tanan", ilabi na kay aduna na diay siya'y daghang mga linya nga giandam, nga iyang isumpay sa maong kanta, depende sa sitwasyon ug sa mga nanan-aw.

Pero, nilanog ang katawa sa mga nanan-aw sa iyang "Halos Tanan" ilabi na niining musunod nga mga linya:  Halos tanang mga tawo corrupt

Halos tanang corrupt mga tawo

Wa la'y labot mga pulitiko

Di na unya sila pakanta nako

Halos tanan, maoy akong giulohan

Niining kantahang bugtong tumong kay lingaw-lingaw lang

Ang mga lyrics, gibali-bali murag "Dili Tanan"

Ang naigo ayaw'g kalagot, katawa nalang 12 FACTS YOU DON'T KNOW ABOUT  ROMMEL TUICO

1. Dili ko mokaon og kanding, mga isda nga tag-as og sungo, ug manok bisaya. Pero, manok nga bantres, aw, mokaon ko. Ambot wala ko kahibaw unsay rason.

2. Dili ko kahibaw molangoy. Kay dili man ko tugtan ni mama sa una nga mokuyog sa mga bata nga maligo didto sa "Pinahagbong".

3. Mohilak ko basta motan-aw og mga drama nga salida. Liwat ko sa ako mama nga kapayason og mata.

4. Maayo ko moluto og utan bisaya. Kay mao mana amo sud-an pirme sa una sa bata pa ko. Maka-highblood sad diay ang utan kun pirmihon noh? Kay sapoton man ka kun maoy sud-an sige. Heheheh

5. Favorite pet nako kay isda. Makawala sa stress ug kakapoy kun magsud-ong ko sa aquarium.

6. Dako ko og kaon pero dugay man sad gutomon. Pwede ra pamahaw ug paniudto usahon para maka-save.

7. Dili ko magpajama matulog. Dili ko ganahan mosul-ob og mga humok og lumoy nga panapton. Komportable ra ko magmaong

8. Mahadlok ko mosakay og "peris wil" ug uban pang mga rides. Naa man gud koy fear of height…. Pero nakasuway nako og wa nakoy planong mousab….. In short, talawan ko.

9. Aduna koy awom dapit sa agianan sa hangin sa akong ilong….usahay masaypan, ila kong badlungon kay mura man og hugaw daw kugmo tan-awon…Swerte ra ba diay kuno na matud pa’s katiguwangan…. Dili kuno ko magutman.

10. Labong, humok, ug sinaw kaayo ko'g buhok sa una. Ambot nangluod seguro kay naghinayhinay man og pangawala. Ako na lang giparutan ug gipasinawan (akong ulo) kay nakadawat na man lang ko sa kamatuoran nga opaw na jud ko.

11. Sa akong nahinumduman, wala pa jud ko kasuway nga nakakita ko ug sumbagay. Kay basta naay mangaway, pasudlon man dayon mi ni mama sa balay.

 12. Buotan, responsable, ug matinahuron ko. Para nako lang ha….. Depende ug naa ra ninyo kun motuo mo…. Hehehe Peace! Daghang salamat!