Erich sa MMK

CEBU, Philippines - Si Erich Gonzales maoy bida sa episode karong Sabado sa Maalaala Mo Kaya kung diin modala siya sa papel nga model-beauty queen nga dunay problema sa iyang panan-aw. Nalakip usab sa maong episode sila si Irma Adlawan, William Lorenzo, Nikki Bagaporo, Abby Bautista, Bianca Bentulan, Ogie Escanilla, Louise Bernardo, Joe Gruta, Amy Robles, Dionne Monsanto, Nina Ricci Alagao, ug Koreen Medina .

Giuswag

Gikatahong iuswag ang paggama sa pelikula nga pagabitoonan unta nila ni Daniel Padilla ug Vice Ganda.  Matud pa nga dili magkatakdo ang tagsa-tagsa nila ka mga schedule apan wala pa’y tataw nga buwan kung kanus-a kini masugdan.

Robin gi-extend sa jasmine

Mapasalamaton si Robin Padilla sa TV5 gumikan kay gipatas-an ang iyang partisipasyon sa programang Jasmine  nga gibidahan ni Jasmine Curtis-Smith. Suma pa ni Robin nga bisan support role ra ang iyang naangkon apan nalingaw siya pag-ayo sa maong programa.

Ikaduhang hugna

Motikang og balik si Lorna Tolentino sa Europe alang sa ikaduhang hugna sa pagpaubos og fresh stem cell therapy. Makauban niya ang iyang talent manager nga si Lolit Solis.

Mibisita sa higala

Mibisita si Erik Santos ngadto sa iyang higala nga si Rachelle Anne Go didto sa London niadtong nilabay adlaw. Mihatag siya og moral support sa singer alang sa pagkalakip  niini sa Miss Saigon sa Prince Edward Theater .

Ceasefire

Nagkasinabot sila si Raymart Santiago ug Claudine Baretto nga mag-ceasefire una sa paghisgot sa tagsa-tagsa nila ka mga kaso. Nibakasyon karon si Raymart sa Thailand. Samtang si Claudine nibutyag nga gikapoy na siya sa paghisgot og mga negatibong butang.

Paukyab lang

Naukay ang fans ni Louise delos Reyes sa hulagway sa ilang idolo sa Instagram kung diin nidako ang tiyan niini hinungdan nga nasaypan ang aktres nga nagsabak. Suma pa ni Louise nga publicity photo lang kini sa umaabot nga episode sa Magpakalainman karong Sabado sa GMA-7 ug midala siya sa role nga babaye nga nagsabak.

Juday tak-om lang

Nagpakahilom lang si Judy Ann Santos sa mitumaw nga report nga matud pa nga usa siya sa miamot sa pagpiyansa sa best friend niya nga si Direk Dante Garcia kinsa napriso gumikan sa kasong estafa.