Angelica ug Diether magpares sa “Passion”

CEBU, Philippines- Gitakda na matud pa nga subling makita sa usa ka teleserye sa ABS-CBN si Diether Ocampo.

Kini pinaagi sa gikatahong remake sa ABS-CBN sa telenovela nga “ Passion de Amor.”

Kahinumduman nga daghan ang nagpangita kang Diether gumikan kay dugay na kaayo siya nga wala igkita sa telebisyon. Katapusan niyang proyekto mao pa ang primetime series nga ‘Apoy Sa Dagat” kauban sila si Piolo Pascual ug Angelica Panganiban.

Si Piolo nakagama na lang og mega blockbuster movie “Starting Over Again” kauban si Toni Gonzaga ug gitakdang makita pinaagi sa teleseryeng “Hawak Kamay” kauban si Iza Calzado. Ang nahisgutang serye maoy muhulip sa Dyesebel nga matapos na karong July 18.

Samtang makauban ni Diether sa Passion de Amor remake mao sab si Angelica nga sama niya wala masundi ang teleserye human sa ilang Apoy Sa Dagat.

Malakip sa nahisgutang remake sila si Cristine Reyes ug JC de Vera, kinsa giintriga na sanglit sunod-sunod ang proyekto niini. Kahinumduman nga bag-o pa nahuman ang toprating serye “Legal Wife” ug nakita usab siya sa afternoon series “Moon of Desire.”

Si Cristine naggikan pa usab sa “Honesto” nga maoy gipulihan sa Dyesebel.

Marvin Leyson mitikang na sa dySS

Human sa dul-an sa 14 ka tuig nga nihatag og kalingawan sa kahanginan, ang award winning actor/writer ug direktor sa radyo nga si Marvin Leyson pormal na nga nibutyag nga taud-taud na siya nga ni-resign sa dyHP-Radio Mindanao Network.

Suma pa ni Leyson nga wala siya’y mahimo sanglit igo ra man siya nisunod sa bag-ong pamaagi sa RMN nga dili mahimo nga motrabaho kanila ang mga tawo nga magpapili og posisyon sa gobyerno.

Si Leyson nagsilbi nga konsehal sa Barangay Kalunasan niining dakbayan sa Sugbo sulod na sa duha ka termino. Tsika pa ni Leyson nga ang iyang sitwasyon, susama ra usab sa nahitabo sa kauban niya sa RMN niadto nga si Jojo Alegre Buron.

“Sakit man ang kamatooran, apan wala na koy mahimo, almost 14 years kong nahimong kabahin sa dyHP isip usa ka artista sa kahanginan, writer ug director, hangtud nga nahimong production manager sulod sa usa ka tuig. Sakit tungod kay nahimo na kining kabahin sa akong kinabuhi, gikan pagka November (sa miaging tuig), wala na ako sa dyHP, dugay nako nga gisulti ang nahitabo nako tungod kay mismo ako, naglisod sa pagdawat sa kamatooran,” matud pa ni Leyson.

Madungog na sa dySS Super Radyo-RGMA ang mga bag-ong sinuwat ni Leyson ilabi na sa alas 10 sa buntag sa drama nga nag-ulohan og “Estong meets Badiday’. Aduna pud siya’y umaabot nga drama series sa CCTN-47 nga nag-ulohan og “Kaagaw”.