Nangyari kay Bong dinaig pa ang mga teleserye

Malungkot ang showbiz sa pagkakakulong ni Sen. Bong Revilla dahil sa pagkakadawit ng kanyang pangalan sa PDAF scam kung saan din kasama ang matalik niyang kaibigan na si Sen. Jinggoy Estrada at iba pa.

Parehong mahal ng industriya sina Sen. Bong at Sen. Jinggoy kaya hindi maialis ang kanilang pagkalungkot sa kinahinatnan ng political career ng dalawang batang senador.

Nahusgahan na ng mga tao ang dalawang senador at iba pa nilang mga kasama kahit hindi pa nagsisimula ang paglilitis at hindi pa napu-prove ang kanilang guilt or innocence sa kasong ibinabato sa kanila bagay na kanilang ikInalulungkot ganundin ng kanilang respective families, friends, and suppor­ters.

Ngayong nakakulong na si Sen. Bong, sa susunod namang mga araw ay tiyak na mala-teleserye rin ang magaganap na pagsuko o pag-aresto kay Sen. Jinggoy Estrada. Dinaig pa nang nangyari sa kanila ang mga umeereng teleserye.

Kung nabubuhay pa sana ngayon ang action star na si Rudy Fernandez, tiyak na hindi nito iiwanan ang dalawa niyang best friends na senador na mag-isa namang ginagampanan ngayon ng isa pa nilang matalik na kaibigan na si Phillip Salvador.

Raymart at Claudine kaya nang magngitian

Last Friday afternoon ay muling nagharap ang estranged couple na sina Raymart Santiago at Claudine Barretto sa sala ni Judge Ge­raldine Fiel Macaraig na may kinalaman sa custody ng dalawa nilang anak na sina Sabina at Santino.  Sinamahan si Raymart ng kanyang dalawang nakatatandang kapatid na sina Rowell at Rhea Santiago at abogadong si Atty. Ruth Castelo habang kasama naman ni Claudine ang amang si Miguel at kapatid na si Mitchie at abogadong si Atty. Ferdie Topacio. Nagkasarilinan ang dating mag-asawa kasama ang judge nang silang tatlo lamang at mukhang maganda ang kinahinatnan ng kanilang usapan dahil may mga ngiti sa kanilang mga labi na lumabas ang dating mag-asawa.

Sa ngayon ay nasa poder ni Claudine ang dalawa nilang anak ni Raymart na sina Sabina at Santino at isa ito sa ipinaglalaban ni Raymart sa korte.

Sa hinaba-haba man ng tunay na buhay na teleserye ng dating  mag-asawa, sana mag-end-up sa maganda ang kanilang court battle.

Happy Birthday…

Personal:  Belated birthday greetings sa sister kong si Estrella Amoyo-Anabeza (June 3), sa dance icon na si Geleen Eugenio (July 12), at kay Gene Sison (June 21), mister ni Joy Sison ng Joy of all Seasons Fashion Jewelries.