Jasmine ug Mario magpares

CEBU, Philippines - Gikatahong nagplano ang TV5 nga hatagan og dugang proyekto si Jasmine Curtis Smith ug ang Thai actor nga si Mario Maurer maoy iyang leading man. Wala pa hinuon matino kung kanus-a sugdan ang negosasyon niini.

Dili na bag-o

Nibutyag ang mga kritiko nila ni Sarah Geronimo ug Matteo Guidecelli nga wala ra sila makugang sa pag-angkon sa duha sa ilang relasyon gumikan kay hagbay ra nga nakahibalo ang kadaghanan niini. Kahinumduman nga puros ra pa-cute ang tinubagan nila ni Sarah ug Matteo niadto kung pangutan-on sila kalabot sa ilang relasyon.

Talent manager ang uyab

Mapasigarbohong gibutyag ni Gardo Versoza nga ang iyang ka live-in partner maoy nagsilbi karon nga iyang talent manager. Nalakip si Gardo sa bag-ong serye sa GMA-7 nga Dading.

Solo flight

Gipadayag ni Elizabeth Oropesa nga bisan adunahan ang iyang kanhi hinigugma nga si Meng Fei, wala gyud siya mangayo og suporta niini alang sa nag-inusara nila nga anak.  Wala na'y komunikasyon si Elizabeth sa kanhi niya hinigugma.

Love scene

Adunay init nga eksena sila si Lauren Young ug Richard Guttierez sa pelikulang Overtime.  Suod ni Lauren ang hinigugma ni Richard nga si Sarah Lahbati busa aminado siya nga dili kini magselos sa maong eksena.

Pahiyom

Nagsukliay og tam-is nga pahiyom sa usa’g-usa sila si Claudine Baretto ug Raymart Santiago human sa ilang hearing sa Marikina Regional Trial Court niadtong Biyernes. Daghan ang nahugyaw sa dihang nagtagad ang duha sa lobby sa korte.

Third choice

Wala panumbalinga ni Maricar Reyes kung third choice lang siya sa iyang role isip kontrabida sa seryeng Sana Bukas Pa Ang Kahapon. Ang labing  importante kaniya nga duna siya'y trabaho. Unang gitanyag ang iyang role ngadto nila ni KC Concepcion ug Iza Calzado.

Dedma ang show

Molihay si Alessandra de Rossi kung pangutan-on siya kalabot ni Sid Lucero. Gitataw sa aktres nga busy pa kaayo siya sa iyang career busa wala pa masulod sa iyang huna-huna nga makabaton og uyab.

Ibalhin og oras

Ibutang  sa  morning timeslot ang programa nila ni Gelli de Belen ug Tintin Bersola-Babao nga Face The People sa TV5. Kahinumduman nga mi-click niadto ang programa ni Amy Perez nga Face to Face nga gibutang usab sa buntag nga timeslot.

Padulong sold-out

Nagmaya pag-ayo si Maja Salvador gumikan kay gamay na lang ang mga nahibilin nga ticket sa umaabot niya nga concert sa Music Museum sunod buwan. Todo praktis na ang aktres sa hugyaw niya nga production numbers sa maong concert.