Ending ng The Legal Wife nanguna

MANILA, Philippines - Tinutukan at pinag-usapan ng buong bayan ang pagtatapos ng patok na family drama series ng ABS-CBN na The Legal Wife na pinagbidahan nina Angel Locsin, Jericho Rosales, Maja Salvador, at JC De Vera. Base sa datos mula sa Kantar Media, nanguna sa listahan ng pinakapinanood na programa sa bansa noong Biyernes (Hunyo 13) ang ‘The End of an Affair’ finale episode taglay ang all-time high national TV rating nito na 36.2% o mas mataas ng 27 puntos kaysa sa katapat nitong Ang Dalawang Mrs. Real (8.8%). Maituturing na record-breaking ang ratings na nakamit ng The Legal Wife para sa 9:15 PM time slot nito. Nag-trend din nationwide at worldwide sa microblogging site na Twitter ang iba’t ibang hashtags na may kaugnayan sa opinyon ng netizens sa pagtatapos ng magkaka-ugnay na love stories nina Monica (Angel), Adrian (Jericho), Nicole (Maja) at Max (JC).

Nagwakas ang serye na pinili ng mga bidang karakter na magpatawad, mag-move on, at magsimulang muli.

Sa ilalim ng direksyon nina Rory Quintos at Dado Lumibao, tampok rin sa The Legal Wife ang ilan sa pinakamahuhusay na aktor sa bansa kabilang sina  Christopher de Leon, Rio Locsin, Mark Gil, Maria Isabel Lopez, Joem Bascon, Ahron Villena, Janus del Prado, at Matet de Leon.