Panalipdan ang pamilya

CEBU, Philippines - Responsibilidad maoy usa sa mopatigbabaw kung ang usa ka tawo mohulma na og usa ka pamilya.

Ang TV host sa ABS-CBN Cebu nga si Kris "Borgie" Nimrod Davis Cabigas kinsa malantawan sa programang MagTV nisaysay dinhi sa Banat News In nga dako kaayo ang papel sa usa ka amahan sa pamilya.

Si Kris kinsa nailhan sa kadaghanan isip Borgie nipadayag nga gipangandaman niya ang maong butang gumikan kay usa na siya ka umaabot nga amahan sanglit lima na ka buwan ang gisabak sa iyang asawa nga si Mhariet.

Gisaulog karong adlawa ang Fathers' Day ug gihulagway kini ni Borgie nga importanteng adlaw alang sa paghatag og tribute ngadto sa mga amahan.

Isip usab usa ka umaabot nga amahan, seguraduon ni Borgie nga mamahimo siya nga responsableng haligi sa iyang pamilya aron makiangayon nga hatagan siya og tribute sa umaabot niya nga anak sa matag tuig nga Father's Day.

"Excited na kaayo ko sa akong baby, kay mao gyud ang dugay nako nga pangandoy.  Dako kaayo og papel sa usa ka amahan, gumikan kay ako manalipod sa akong pamilya sa bisan unsa man nga hitabo," suma pa ni Borgie.

Pipila sa maayong kalidad sa usa ka maayong amahan mao ang pagka-mapinanggaon niini ngadto sa iyang pamilya ug paghatag og saktong pagmahal ingon man usab nga magsilbing ehemplo sa iyang anak alang sa saktong pamatasan.

Gawas sa iyang pagka-TV host, nagtrabaho si Borgie isip usa ka sales executive sa usa ka dakong kompaniya dinhi sa Sugbo.

"Manganak na gani ang akong asawa, nagplano gyud ko nga  mo-leave sa akong work bisan pila lang ka weeks kay gusto ko makaatiman ko og maayo sa akong anak," dugang pa ni Borgie.

Gisaad ni Borgie nga ayuhon niya pagpadako ang iyang anak aron magpabilin ang iyang legacy sa umaabot nga henerasyon sa iyang kaliwat.

""Ang amahan maoy pundasyon sa pamilya busa mangita gyud ta og paagi nga magmalipayon ang atong pamilya ug makasuporta ta sa ilang panginahanglanon. Kung lig-on gani ang pundasyon, seguradong lisod usab kini bungkagon," panapos pa ni Borgie. (Anden Miles)