“Nothing is Imposible”

CEBU, Philippines - Dili pud magpalupig ang mga Sugbuanon sa natad sa pag-arte, gani nakahulma na kini og nagkadaiyang lilas nga nakapalingaw sa katawhan.

Kung hisgutan ang talento sa pag-arte, usa sa miarangkada niini mao ang Sugbuanon nga si Badidi Labra kinsa aktibo sa pagsalmot og mga indie film.

"Para nako, importante kaayo ang pag-arte sa akong kinabuhi kay daghan kaayo ko og nakat-onan ug mao usab ang nakapausab sa akong panglantaw sa life," saysay pa ni Badidi dinhi sa Banat News Hugyaw (BNH).

Kahinumduman nga nahimo siya nga best actor sa Sinulog Film Festival sa miaging tuig alang sa entry niya nga Gugmang Tiunay ni Daniella.

Nahimo usab siya nga nominado pagka-best actor karong tuiga sa 2014 UPelikula ug sa 2014 Sinulog Short Film Festival alang sa pelikula niya nga Dag-um.

Malakip usab si Badidi sa entry sa Cinemalaya 2014 nga Ina-Tay busa nagmalaumon siya nga hatagan kini og init nga suporta sa katawhan.

QandA

BNH: Para nimo, nganong maayong mohimo og pelikula ang mga Cebuano?

Badidi: Lahi ang atake sa mga Cebuano sa paghimu og pelikula,mas naay unod,mas naay emosyon,ug mas muduot sa kasingkasing.

BNH: Giunsa nimo pagdiskubre ang talento nimo sa pag-arte?

Badidi: Actually,mas ganahan gyud unta ko mahimong screenplay writer or director pero mura’g mao man jud ang napadulngan nako,ang pag-arte. Sa bata pako medyo naa na daw ko potensyal na mahimong artista kay magdrama-drama man mi sa akong ig-agaw kung kami ra duha, siya si Mara niya ako si Clara,hahahaha.

BNH: Unsa ang imong gikabisihan karon?

Badidi: Karon gikuha ko sa SINEGUGMA pinaagi ni  Sir Marlon Hofer nga nahimong  mentor sa inter-brgy film making contest ug ang akong gidala mao ang akong barangay, ang Barangay Guadalupe ug nag-prepare pud ko sa umaabot nga Cinemalaya 2014 sa Manila alang sa among entry nga INA-TAY (Ang Inahan Na Tatay). Naa pud ko'y umaabot nga dako kaayo nga project nga sigurado ko nga malingaw ang mga  Cebuano ug mga bisaya sa tibuok Vis-Min.

BNH:  Nalakip ka sa indie film nga  INA-TAY nga  official entry sa Cinemalaya 2014 , unsa imong role sa maong proyekto?

Badidi: Ako si Angela usa ka bayot nga anak ni Elvira nga usa usab ka bayot ug mao na ang conflict sa ilang life nga gi- tackle sa movie.

BNH:  Describe this line, “acting with social responsibility".

Badidi: Para nako dili lang ni para sa mga actor kundi para ni sa tanan, dapat 'ta  mahimong responsabli sa atong mga lihok ilabi na katong mga tawo nga ilado or sikat kay being an actor or a person nga naa sa showbiz, daghan ang nagtan-aw nimo  ug giisip ka nga role model. So dapat be yourself but hinumdumi pod nga naa kay responsibilidad isip artista.

BNH: Sa kaugalingon nimo nga paagi, isip sakop sa LGBT community unsaon nimo pag-promote ang inyong mga katungod?

Badidi: Sa una ang mga LGBT member pirme lang bestfriend sa bida,parlorista,maid,back up sa kontrabida ug pirmi himuong kataw-anan sa mga salida. Ang akong tumong mao ang ipakita nga bisan unsa pa imung sexuality kung maayu ka moarte ug naa jud sa imung heart imung trabaho dili babag ang imung gipili nga sexuality aron mahimo nimu imung gusto. Ako, if matagaan og chance nga musuwat ug mo lead og usa ka salida ako i- make sure nga pirmi LGBT ang bida nga character aron usab mapakita namu nga naa mi katakos nga molingaw ug labi na mupahibalo. (BANAT NEWS)