Derek-Marian movie ‘di pa sigurado

Ang The Amazing Race Philippines na ang next big show ng TV5 to be hosted again by Derek Ramsay. Sa August na raw magsisimula ang ai­ring ng reality show. May nationwide search para sa mapipiling contestants at nauna nang mag-pictorial at mag-shoot ng plug si Derek.

May nationwide audition sa TARP contestants na magsisimula sa June 13, sa Cebu. May audition din sa Davao sa June 20, sa Pampanga sa June 22, at sa Eastwood City sa June 28.

 Sa August din ang 2014 Cinemalaya, kung saan, kasama si Derek sa The Janitor as the bad guy. Hinahanapan din siya ng leading lady sa gaga­wing movie sa Regal Entertainment at narinig namin ang mga pangalan nina Marian Rivera, Solenn Heussaff, at Lovi Poe na pinagpipilian.

Samantala, naka-move on na si Derek sa lungkot sa pagkamatay ng pet dog niyang si Beyonce dahil may bago itong tini-train na puppy na tinawag niyang Jamba.

Mark tapos na ang suspensiyon

Balik na pala sa Sunday All Stars si Mark Herras, napanood na namin siyang sumasayaw last Sunday. Tama ba ang nakita naming kasama pa niya sa production number si James Reid na isa sa mga rason ng kanyang suspension. Siguro naman, binabati na ni James si Mark at ibang taga-SAS.

Ilang linggo ring absent si Mark sa SAS dahil sa mga pahayag nito na hindi  nagustuhan ng production staff. Bukod sa kaso kay James, nalungkot din si Mark sa pagkakaalis ng mga kasama sa show gaya ng close sa kanyang si Julian Trono.

Hindi pa rin ibinalik ang artists na pinaghinaya­ngan ni Mark na nawala sa show dahil maiksi pa rin ang oras ng SAS. 

Janno naingayan kay Jillian

Si Mona Louise Rey lang ang nakita naming kasama ni Janno Gibbs nang mag-recording ang child star ng theme song ng My BFF na komposisyon ng singer-actor. Akala namin initsa-puwera ni Janno si Jillian Ward sa pagkanta ng theme song na pinamagatang Best Friends dahil hindi nagustuhan ang pagkanta-kanta ni Jillian sa interview sa kanila para sa family series.

Panay kasi ang kanta ni Jillian ng Beatles songs at Let It Go habang kausap ng press si Janno at pabiro siyang sinaway ni Janno. Akala namin, na­inga­yan si Janno, kaya si Mona Louise lang ang pinakanta ng theme song.

Pero sabi sa amin, duet nina Jilian at Mona ang theme song ng show nila at nag-recording na ang da­lawa, si Mona lang ang kumuha ng picture at pi­nost sa Instagram (IG). Kakantahin ito ng dalawa sa promo nila ng My BFF na airing na sa June 23 sa direction ni Roderick Lindayag.

Paolo ginagaya si Roderick

Seryoso kaya si Paolo Ballesteros sa sinabing si Roderick Paulate ang peg niya sa pagku-co-host kay Marian Rivera sa dance show na Marian? Tinanong ito ng press kung anong istilo nang paghu-host ang gagawin niya para maiba sa hosting style niya sa Eat...Bulaga at si Ro­de­rick nga ang binanggit.

Unlike sa Eat...Bulaga na naka-shorts at nakikita ng viewers na pinagpapawisan ang kili-kili, sa Ma­rian, mabango siya at formal lagi ang suot. Nanawa­gan nga ito sa mga designer na gusto siyang bihisan, welcome raw sila.

Bashers tameme kay Baby Zion

Kailangan lang palang ilabas nina Richard Gutier­rez at Sarah Lahbati ang picture ni Baby Zion at nawala ang bashers nila sa social media. Na kay Baby Zion ang focus ng lahat ngayon at walang masabi ang nakakita sa picture ng bata kundi cute ito.

Hindi lang magkasundo ang followers nina Ri­chard at Sarah kung sino sa kanila ang kamukha ng baby nila na bibinyagan na sa Sunday.