P100 M na sila!

CEBU, Philippines - Giisip na nga blockbuster movie ang pelikulang ‘Maybe This Time” ang unang movie nila ni Coco Martin ug Sarah Geronimo. Kini human nakaabot na matud pa kini sa 100 million mark sa box office. Iya kini sa Star Cinema ug Viva Films.

Lahi nga KathNiel ang masud-ong

Kada adlaw na ang shooting sa umaabot nga pelikula nila ni Daniel Padilla ug Kathryn Bernardo (KathNiel), ang “I’m Dating A Gangster.” Lahi gayud matud pa kining maong pelikula sa tanan nilang nahimo na, ug matud pa ni Kathryn, bisan wa pa kini mahuman, mao na kini ang iyang labing paborito sa tanan gumikan sa maanindot nga istorya niini.

CB ang target

Gihimakak ni Xian Lim nga gihatag na ngadto niya ang umaabot nga remake sa ABS-CBN sa pantaserye “Captain Barbell.” Suma pa niya, wala pay nasulti niya ang management nga ingon niini. Apan kun siya gyuy hatagan, dili gyud niya balibaran.

Happy and enjoy lang

Hangtud karon wala gihapoy giangkon ug gihimakak si Matteo Guidicelli kabahin sa tinuod nga relasyon nila ni Popstar Princess Sarah Geronimo. Giangkon hinuon niya nga nanan-aw sila ni Sarah sa pelikula niining “Maybe This Time” nila ni Coco Martin. Kauban nila ang magtiayong Judy Ann Santos ug Ryan Agoncillo. Suma ni Matteo, gi-enjoy nila kun unsa man gani ang naa kanila karong duha.

Stressful basta mistress

Bisan pa man sa kasikat karon sa teleserye nga The Legal Wife sa ABS-CBN ug sa iyang karakter nga Nicole, gipadayag ni Maja Salvador nga nakaginhawa na siya’g lawom kay last two taping days na lamang matud pa sila. Suma pa ni Maja, “nakaka stress pala maging mistress.”

Paukyab?

Na-pack ang taping niadtong nilabay nga adlaw sa Jasmine, ang self-titled series ni Jasmine Curtis Smith. Mismong director matud pa niini nga si Mark Meily ang nimando nga i-pack-up, apan wala pay tino nga rason nga gipadayag. Gumikan niini, wala pa silay episode nga isalida karong Domingo sa gabii.

Jolens nag-una sa survey

Si Jolina Magdangal maoy nag-una sa survey sa www.abs-cbn.com. Ang pangutana kay: Sinong Star Magic artist ang na-miss mo? Makabungog nga 52% sa kinatibuk-ang botos ang nadawat ni Jolens. Gisundan siya ni Claudine Barretto nga may 26%, Victor Neri nga may 8% ug managsama nga may 7% sila si Onemig Bondoc ug Marvin Agustin. Nikabat og 31, 187 ang kinatibuk-ang botos.

Leading ladies magtigi

Ang Kapuso leading ladies nga sila si Glaiza de Castro, Kylie Padilla ug Lauren Young maoy magtigi karong gabii sa lain na sab nga kataw-anang episode sa ‘Celebrity Bluff” , 9:15pm sa GMA7. Mag-aron ingnong maestra ang host nga si Eugene Dominggo ug magleksyon ngadto sa mga contestant ug viewers.

Kara nag-training sa PAF!

Nipailawom gyud og rigid training ang award-winning broadcast journalist nga si Kara David para sa iyang I-Witness episode karong gabii nga giulohan og “Airborne.” Nisalmot siya sa higpit nga pagbansay bansay sa mga sakop sa Special Operations Wing sa Philippine Air Force. Atangi kun makakuha ba siya’g pagtugot nga makaambak gikan sa eroplano karong gabii sa I-Witness pagka human sa Celebrity Bluff.

Bettina co-host na

Pasok na si Bettina Carlos isip bag-ong co-host ni Chef Boy Logro sa “Master Sa Kusina” sugod karong Domingo, 7:15 sa gabii sa GMA News TV.