Dina muapil sa Miss World

CEBU, Philippines - Gikatahong ibalik sa GMA-7 sa dili madugay ang reality-artista search Starstruck. Ang nahisgutang reality show maoy gigikanan nila ni Jennylyn Mercado, Mark Herras, Katrina Halili, Cristine Reyes, Mike Tan, Ryza Cenon, LJ Reyes, Aljur Abrenica, Kris Bernal, Jackie Rice, Sarah Lahbati, Diva Mantalaba ug daghan pa.

Samtang nipauli dili pa lamang dugay ang Sugbuanong si Mantalaba alang sa taping sa pipila ka eksena sa GMA7 primetime teleserye nga nagsugod adtong Lunes, " Ang Dalawang Mrs. Real," nga gibituonan nila ni Dingdong Dantes, Lovi Poe ug Maricel Soriano. Ig-agaw ni Lovi ang role ni Diva, ug taga Sugbo sila sa istorya.

Atol sa iyang pagpauli, nipailawom si Mantalaba og photo shoot kauban ang inilang make-up artist Wenwen Zaspa ug photographer nga si James Go, diha sa dalan Colon. Suma pa ni Zaspa, kanunay na nila kining himuon matag higayon nga mupauli si Mantalaba sa Sugbo isip lingaw-lingaw.

Apan niining labing uwahing pagpauli ni Mantalaba, daghan matud pa ang nidasig kaniya nga pasalmuton og Miss World Philippines 2015. Gipaabot pa ang pinal nga hukom ni Mantalaba kabahin niini. Kahinumduman nga sa wala pa siya na-artista, nisalmot usab siya og nagkadaiyang beauty pageants dinhi sa Sugbo.

Lakip sa iyang titulo mao ang Miss USJR, diin nagtungha siya kaniadto sa kursong Tourism.  

Barugan gyud ni Deniece

Gipadayag ni Deniece Cornejo nga wala gyud siya nag-inarte sulod sa prisohan gumikan kay iyang kabubut-on ang pag-surrender niya niadto sa kapolisan. Wala gihapon mawad-i og paglaum si Deniece nga maangkon ang tinud-anay nga hustisya. Kini kalabot sa iyang pasangil nga gilugos gyud siya ni Vhong Navarro.

Derrick mag-usab na

 Tsika pa ni Derrick Monasterio nga nagka-mature na siya busa nagkahupas na ang iyang pagka-babaero. "Hindi na po ako nambababae," hirit pa sa aktor.

Tambag ni Papa

Gitambagan ni Jomari Yllana ang iyang anak nga si Andre nga magtuon una og luwas nga pagmaneho  sa dili pa kini mosalmot og car racing. 

Joshua 19 anyos na

Gisaulog kagahapon sa anak ni Kris Aquino nga si Joshua ang iyang 19th birthday.  Nagkanayon  si Kris  nga himuon didto  sa Boracay ang party alang kang Joshua .

Lisod nga eksena

Gitun-an gyud pag-ayo ni Joem Bascon ang paghupot og pusil samtang nagmaneho og motor  gumikan kay gikinahanglan kini sa indie film niya nga Ang Bagong Dugo. Suma pa ni Joem lisod kaayo ang maong eksena apan mapasalamaton siya gumikan iyaha gyud kini nga nabuhat.

Giuswag

Mataud-tauran pa ang plano ni Maricar Reyes niadto nga kinahanglan nga makabaton sila og anak sa iyang bana nga si Richard Poon sulod karong tuiga. Suma pa ni Maricar nga wala siya magdahom nga malakip siya sa seryeng "Sana Bukas Pa Ang Kahapon" sa ABS-CBN busa ma-busy na pud siya karong panahona.

Pakpak Isabelle!

Gipasigarbo pag-ayo ni Isabelle Daza ang paglampos niya sa finish line sa bag-ohay lang nga KONA Ironman 70.3 nga gipahigayon didto sa Hawaii. Kapin sa pito ka oras ang record niya sa maong kompetisyon.

Matuman na gyud

Matuman na ang pangandoy ni Ai Ai delas Alas nga makauban niya sa love scene si Cesar Montano. Nasayran nga misugot na si Cesar nga mahimong leading man ni AiAi sa umaabot niya  nga indie film nga nag-ulohan og Ronda.

Kylie mipasingit

Giingong naliki ang katawhan sa gisugilon ni Kylie Padilla nga matud pa seguradong masuko og samot ang iyang fans ngadto kang Aljur Abrenica kung mosulti siya sa tinud-anay nga rason sa ilang breakup. Sa maong padayag ni Kylie, daghan ang nagduda nga nakakita gyud og laing babaye si Aljur.

My Destiny

Sila si Carla Abellana ug Tom Rodriguez ang magpares sa umaabot nga serye sa GMA-7 nga My Destiny. Suma pa nga daghan ang ni-request nga sila gihapon ang mag-uban sa usa ka proyekto gumikan sa maayo nila nga chemistry.

Vhong nasakitan

Nasakitan pag-ayo si Vhong Navarro kalabot sa komento ni Cedric Lee sa dihang wala siya makatambong sa mediation sa kasong Grave Coercion nga gipasaka niya sa maong negosyante ug kang Deniece Cornejo. Kahinumduman nga nilenggua si Cedric og, "Baka may iba pang niri-rape."

Coco maayo moluto

Tsika pa ni Coco Martin nga mahilig siya sa pagluto, gani nakatilaw na si Sarah Geronimo sa giluto niyang sud-an sa dihang gidad-an niya kini niadto sa set sa pelikula nila nga Maybe This Time. HRM ang kursong nahuman ni Coco.

Gab na-pressure

Giangkon ni Gab de Leon nga na-pressure siya sa pagsulod niya sa  showbiz gumikan kay nasayod siya kung unsa kamaayo ang mga ginikanan niya nga sila si  Christopher de Leon ug  Sandy Andolong.

AiAi mipaambit sa grasya

Tradisyon na ni AiAi delas Alas ang pag-donate og kuwarta matag tuig  sa usa ka foundation nga dugay na niya nga gisuportahan. Suma pa sa komedyante nga gaan kaayo ang iyang pamati kung makapaambit siya sa blessings nga iyang nadawat.

Fan ni Bea

Gipadayag ni Susan Roces nga kanunay siya nga molantaw sa mga nangagi nga pelikula ni Bea Alonzo gumikan kay fan siya sa aktres busa dako ang iyang kalipay nga nalakip siya sa seryeng Sana Bukas Pa Ang Kahapon nga gibidahan  niini. (BANAT NEWS)