Fans ni Kathryn mihirit

CEBU, Philippines - Gipadayag ni Kathryn Bernardo nga dili niya ma-kontrol ang iyang fans ug gitataw niya nga normal lang gyud sa artista nga makadawat og mga pagsaway sa ubang tawo. Gisaysay kini ni Kathryn isip reaksyon niya sa pagpangatake sa iyang fans ngadto sa soft drink commercial kung diin nagpares sila si Julia Barretto ug Daniel Padilla.

Dili moatras

Buhaton ni Laguna Governor  ER Ejercito ang tanang legal  nga pamaagi  aron dili siya mapapahawa sa iyang  puwesto. Kahinumduman nga gimanduan sa Commission on Election si Ejercito nga pabiyaon na sa iyang puwesto gumikan sa "overspending" atol sa piniliay niadtong 2013.

Early  birds

Sayo kaayo nga nangabot sila si Glaiza de Castro ug Benjamin Alves atol sa presscon sa umaabot nga serye sa GMA-7 nga "Dading".  Misunod dayon sila si Gabby Eigenmann, Chynna Ortaleza, Gardo Versosa, Mymy Davao ug Toby Alajar.

Tinubdan sa pangalan

Dakong garbo alang ni  Ryza Cenon human niya nasayran nga sa iyaha diay  gibase ang  pangalan sa   kapuso child wonder nga si Ryzza Mae Dizon. "Sabi pa ng nanay ni Ryzza, 'Ikaw ang gustong-gusto ko kaya pinangalan ko si Ryzza sa 'yo.". tsika pa ni Ryza.

Malipayon ra

Gipadayag ni Christian Bautista nga single siya  apan  malipayon karon ang iyang kinabuhi. Gitataw hinuon sa singer nga andam siya nga mahigugma og balik. Katapusang nauyab ni Christian mao ang actress-radio host  nga si Carla Dunareanu .

Cess isog gihapon

Gihangop ra ni Cess Visitacion ang mga pagsaway nga iyang nadawat human nakagawas siya sa PBB All-In gumikan sa force eviction."Natutuwa talaga ako sa kanila na nag-give pa sila sa akin ng oras para mag-type, mag-Internet or pumunta pa ng coffee shop 'yung iba para lang mag-comment sa akin na ayaw nila ako," matud pa ni Cess.

Martin komportable ni Yasmien

Giangkon sa bag-ong kapuso aktor nga si Martin Del Rosario nga komportable siya kang Yasmien Kurdi ug dali ra sila nga magkasinabot niini sa pipila nila ka mga eksena sa Rhodora X. "Siyempre kapag ka-trabaho ko siya, napi-feel ko na may connection," matud pa ni Martin.