Kumusta si Keybird?

CEBU, Philippines -  Padayon nga nagtungha og tarong aron makab-ot ang iyang gipangandoy. Mao kini gibuhat karon sa 21- anyos nga si Keybird Padilla kansang pangalan misidlak og kalit niadtong 2003 human gitabangan niya ang mga barangay tanod ug polis sa pagtultul sa nahimutangan sa usa ka snatcher nga responsabli sa paglabni sa alahas sa usa ka magtutudlo.

Naluoy si Keybird sa usa ka magtutudlo nga nagsakay og jeep sa dihang nakit-an niya nga gilabni ang ariyos niini.

Hilom nga gisundan ni Keybird ang gidaganan sa isnatser busa iyaha dayon kini nga gitug-an sa mga tanod ug polis nga miresulta sa pagkasikop sa maong isnatser.

Nag-edad pa lang siya og12 niadtong higayona ug gitataw niya nga dili babag ang iyang edad sa paghatag og kooperasyon ngadto sa kapolisan aron mapakgang ang mga dautang elemento.

"Naluoy man gud ko sa teacher, naghilak siya og maayo kay gikuha iyang ariyos. Wala man sad ko ka-feel og kahadlok atong orasa, ang naa sa akong huna-huna nga makatabang ko og tawo," suma pa ni Keybird.

Pangandoy gyud unta ni Keybird nga mahimong pari gumikan kay nahimo na siya nga aktibo nga tinun-an sa summer catechism nga gipasiugdahan sa ilang Mt. Carmel Parish diha sa dalan Magallanes.

Apan nausab ang dagan sa hangin, gusto niya nga mahimong polis sukad siya nakatabang og babaye nga gilabnihan og ariyos.

Gikuha niya ang kursong BS Information Technology sa Asian College of Technology apan mokuha siya og special examination kung mahuman na siya sa maong kurso aron hingpit siya nga mamahimong polis.

Gumikan sa kasikat ni Keybird kaniadto diin nalandig pa sa pahina sa Reader's Digest- Asia, gihatagan siya sa Ramon Aboitiz Foundation of Scholarship nga mao karoy iyang gipahimuslan. Sanglit baniog man kaayo ang iyang ngalan, giduol siya sa mga tinugyanan sa ABS-CBN longtime drama anthology Maalaala Mo Kaya, diin  nasalida ang istorya sa iyang kinabuhi niadtong 2004.

Paglabay sa 10 ka tuig, hingpit nga nahimamat ni Keybird ang host sa maong programa nga si ABS-CBN President Charo Santos Concio atol sa MMK Visayas Reunion niadtong Biyernes  diha sa Cebu City Waterfront Hotel.

Sa maong kalihukan, nitambong ang tanang letter sender kansang mga istorya nasalida sa maong programa sulod sa usa ka dekada. Nasayran nga nagsaulog karon ang MMK sa ika-23 na niini ka tuig sa telebisyon.

Ang episode ni Keybird sa MMK nag-ulohan og "Police Car" gumikan kay mao kini ang iyang gidala sa dihang gi-interview siya sa researcher sa MMK ug nahaom usab kini sa sitwasyon  niya niadto kung diin napukan gyud ang dautang elemento gumikan sa pagtug-an niya sa nahimutangan sa isnatser.

Sa episode nga Police Car ni Keybird, midala sa iyang karakter mao ang kanhi child star nga si Goyong, samtang midala isip iyang mama mao ang singer-actress nga si Zsa Zsa Padilla.

Matud pa ni Keybird nga nalipay siya og maayo nga gi-feature sa MMK ang istorya sa iyang kinabuhi gumikan kay magsilbing inspirasyon ngadto sa kabataan nga duna gyud sila'y mapaambit aron magmalinawon ang atong komunidad.

Mapahiyomong gibutyag ni Keybird nga barkada ra diay niya sa una ang isnatser nga iyang gipadakop. Giingong nakagawas na sa prisohan ang maong isnatser, gani magtagad na sila niini.

"Para nako kay dako gyud og matabang ang edukasyon kanato. Gibuhat gyud ni nako para sa akong mama nga maoy nag-atiman gyud nako," suma pa ni Keybird nga nipadala sa iyang mensahe sa Banat Hugyaw pinaagi sa Facebook.

Matud pa niya nga tighugas og plato ang iyang mama sa usa ka carenderia niadto diha sa Carbon Market ug dunay mga higayon nga sa kilid-kilid lang sila mangatulog.

Human sa bayanihong buhat ni Keybird, gihatagan ang iyang mama og trabaho sa Department of Public Services diha sa Cebu City Hall.

"Kung tan-aw natu nga dunay manginahanglan sa atong tabang, ato gyud nang tabangan bisan na man lang sa ginagmay  nga paagi," dugang pa niya.

Samtang ang inahan niya nga si Rowena nisaysay dinhi sa Banat News Hugyaw nga  buotan kaayo si Keybird ug todo gyud ang pagpangga niya niini ilabi  nga bugtong lamang kini niyang anak.

Nagkanayon si Rowena nga wala gyud nagpabadlong kaniya ang iyang anak ug naka-focus na gayud kini sa iyang pagtungha aron makab-ot gyud niini ang pangandoy niya sa iyang kinabuhi.