Butuan pride palagsing!

CEBU, Philippines -  Tilawan nato ang PALAGSING! Mao kini ang ikapasigarbo nga delicacy sa Butuan City sa Agusan Del  Norte. Usa kini ka suman o budbod nga gihimo sa "Unaw"  o "Starch" gikan sa Sago Palm Tree nga gisagulan og lubi ug pula nga asukar. Sikat kini nga hinimo sa Banza, usa ka karaang poblasyon sa Butuan City. Ang Banza giila nga abunda sa Lumbiya (Metroxylon sagu Rottb.) kun diin nahimutang ang unaw aron sa pag-ani niini sa Palm Tree.

Ang palagsing maoy kanunay idalit sa mga Butuanon atol sa City's Foundation o selebrasyon sa maong lugar. Ipahigayon sab matag tuig ang Palagsing Festival aron pagpasigarbo niining maong delicacy. Lami sab ang  palagsing sa pamahaw ug meryenda labi na'g adunay pares nga kape.

Gihimo ni siya sama sa pagsagol-sagol sa asukal, lubi ug unaw nga mao'y main ingredients. Pagka human og sagol, ukayon kini og maayo hangtod mahagkot ang palagsing. Purmahon dayon og pataas ug i-rolyo ug puston og dahon sa saging, dayong higtan ang matag tumoy. Pabukalan dayon balig 30 minutos.

 Kani siya makit-an o mapalit sa Langihan usa ka "market" sa Butuan City, ug nagkantidad og P10 ang  upat ka buok.

Sa pagbisita sa Butuan dili gayud palabyon ang higayon nga dili matilawan ang palagsing. Ang maong delicacy nga gipasigarbo sa mga Butuanon sa mga turista, matud pa, "ancient food" nga angayan gayud nga matilawan sa bag-ong henerasyon.