Chito ug Neri engaged na!

CEBU, Philippines - Gipistahan sa Youtube ang gi-upload nga video ni Chito Miranda kung diin nipadangat siya sa iyang marriage proposal ngadto kang Neri Naig.

Emosyonal ang Parokya ni Edgar lead vocalist sa dihang gidawat ni Neri ang iyang proposal ug matod niya nga siya na gyud ang labing suwerte nga lalaki sa kalibutan.

Gikunsabo ni Chito ang iyang higala pinaagi sa pagsulti kang Neri nga adunay music video nga pagahimuon ug ang dalaga maoy himuong model niini. Nakugang na lamang si Neri dihang, sa katapusang eksena unta sa maong music video kalit nga nilugwa ang proposal ni Chito pinaagi sa big screen.