Scientastics

Ang climate change mao ang labing importanteng hisgotanan karon. Dili ikalalis nga samtang nagka-high-tech ang kalibutan, nagkaanam usab ka kritikal ang sitwasyon sa atong Mother Earth. Ang mga eksperto sa lakat sa panahon mipasidaan sa daghan pang umaabot nga mga kalamidad sa kinaiyahan. Kitang mga tawo maoy unang mabasol sa dili na masabot nga kahimtang sa atong kalibutan. Tungod kini sa atong mga binuhatan sama sa walay kaluoy nga pagpatay sa mga kahoy, pagsunog sa mga plastic, ug paggamit sa mga butang nga makadaut sa kalikopan. Apan kun tawo ang hinungdan ning tanan, tawo usab ang sulosyon. Kinahanglan nga magsugod sa atong mga panimalay ang pag-amuma ug pag-amping aron maluwas ang kinaiyahan. Simpleng mga butang sama sa hustong paglain sa mga basura dako na kaayo'g ikatampo sa mga paningkamot aron pagtabang nga maminusan ang epekto sa gitawag og climate change.

Ubos sa paningkamot ning tagsulat, gipahigayon ang labing unang Science Investigatory Project Festival nga giulohan og Scientastics, diha sa University of Cebu Maritime Education and Training Center. Mao kini paagi sa mga tinun-an sa UCMETC nga makatampo og mga ideya unsaon pagtabang nga maluwas ang atong planeta sa tunhay niining pagkagusbat. Baynte-singko ka imbensyon sa mga estudyante ang gipasundayag atol sa tulo ka adlaw nga eksibit. Tungod kay pulos mga earth-friendly ang materyales nga ilang gigamit, maghatag og hayag nga kaugmaon alang natong tanan ug taas nga kinabuhi sa atong Inang Kalikasan kining maong mga imbensyon.

Mga mananaug

Ang Solar Vessel, nga imbensyon sa mga first year Marine Honors' Class, maoy migawas nga festival champion. Ang proyekto, nga napili usab nga Best Visual Display, migamit sa solar panel nga maoy mohigop sa init sa adlaw nga maoy tinubdan sa kuryente ug maoy mopasiga sa mga suga ug mopadagan sa barko. Ang Council of Maritime Leaders malaumon nga pinaagi sa Solar Vessel maminusan ang air pollution sa kadagatan.

Nakaangkon sa ikaduhang ganti isip tie ang Wireless Charger sa first year Marine Stolts Scholars ug Bicycle Trash Collector nga gi-imbento sa first year Marlow Navigation Scholars. Migamit ang Wireless Charger sa konsepto sa electromagnetic induction ug mahimo kining mo-charge sa tanang klasing cell phone nga dili mogamit sa wire. Samtang ang Bicycle Trash Collector hinimo sa 100% recycled garbage. Usa kini ka alternatibong sakyanan sa katubigan nga maoy gamiton pagkuha sa mga hugaw ug basura. Modagan kini sama sa pagpadagan sa bisiklita. Nakadayeg niini si Bb. Pilipinas-World 2010 Anna Maris Igpit, kinsa mi-cover sa festival alang sa programang Buena Mano Balita sa GMA7. Matud niya nga iyang dad-on ang maong ideya didto sa Bohol. Abunda ang maong probinsya sa kawayan, usa sa labing importanteng materyales sa proyekto. Napili usab ang Bicycle Trash Collector nga Most Earth-Friendly Project.

Nahimutang sa ikatulong dapit ang Styrobond nga entry sa first year International Maritime Company (IMEC) scholars. Gisuwayan ang ka-epektibo sa ilang mugna sa nagkalain-laing butang ug napamatud-an nga makahawid kini hangtud sa tunga sa kilo. Dali ra usab kini mauga. Abtan pa sa pipila ka dekada aron kompletong matunaw ang usa ka Styrofoam. Busa pinaagi sa Styrobond project, mominus na unya ang basurang mugna sa Styrofoam. Napili usab ang imbentor niini nga Best Oral Presenter.

Nakadaug nga Best Narrative Report ang tampong Solar Water Distiller. Ang usa ka hugaw nga tubig limpyohan pinaagi sa natural nga proseso nga naglangkob sa pagbutang sa tubig ilawom sa adlaw hangtud nga mo-evaporate kini ug moagi sa gitawag og condensation nga moresulta sa usa ka limpyong tubig ug luwas nang imnon. Napili nga Best Abstract ang tampo nga Jackfruit-Seed Coffee. Matud sa mga pagtuon, unom sa napulo ka mga hamtong napamatud-an nga moinom sa kapi. Ang pag-inom sa Jackfruit Coffee makaayo sa panglawas tungod sa mga bitamina ug mineral nga makuha niini.