Bong may buwelta sa sinabi ni Napoles kay Ping Lacson

Nagkuwento na si Mama Vicki Belo tungkol sa halos dalawang linggo na pagsasama nila ni Senator Bong Revilla, Jr. sa Holy Land.

Kami naman ni Bong ang magkikita sa susunod na linggo at tatanungin ko rin siya tungkol sa pagtatagpo nila nina Mama Vicki at Hayden Kho, Jr. sa isang holy place.

Siyempre, itatanong ko rin kay Bong ang reaksyon niya sa pralala na handa nang magsa­lita si Janet Napoles tungkol sa mga nalalaman nito sa pork barrel scandal.

Kabilang ako sa milyun-milyong Pilipino na naghihintay na ilabas ng Department of Justice ang notarized statement ni  Napoles at listahan ng mga senador, congressmen, at mga government official na idinawit niya sa pork barrel scandal.

Nakakaintriga ang sinabi ni Senator Ping Lacson na hindi umabot sa 19 ang pangalan ng mga senador na nasa listahan ni Napoles  pero may quorum.  Ang sey ni Papa Ping, “ Maraming  pangalan, hindi lang sa Senate. Pati sa House, may mga pangalan na hindi ko  inakala na kasama doon pero nakasama.”

Parang teleserye na sinusubaybayan ng mga Pilipino ang bagong pasabog ni Napoles na nagbigay ng kaba sa mga idinadamay niya sa pork barrel scandal.

Apo ni Cong. Lito Atienza nanalo sa Ellen Show

Ang suwerte naman ni Akio Roces, ang anak nina former Congressman Miles Roces at Maile Roces.

Very lucky ang bagets dahil nag-win siya ng 48-inch television nang manood siya ng show ni Ellen DeGeneres.

Ang pangalan ni Akio ang mapalad na tinawag ng sikat na American TV host. Siyempre, tuwang-tuwa ang bagets dahil first time niya sa studio ng Ellen, nanalo pa siya ng malaking TV set.

The who si Akio?  Pamangkin siya ni Papa Kim Atienza at apo ng aking favorite na si Papa Lito Atienza na ex-mayor ng Maynila, ex-DENR Secretary, at  house representative ngayon ng Buhay party list.

Hindi ko pa nauusisa si Miles kung  iniuwi nila ni Akio sa Pilipinas ang bonggang TV set na siguradong 110 volts o iniwan sa kanilang mga kamag-anak sa Amerika?

LT sinamahan nina Amy at Lynn sa Bicol

Nagpunta kahapon sa Legaspi, Albay si Lorna Tolentino dahil inimbitahan siya na mag-judge sa isang event.

Nang malaman ng Legends members na bibiyahe si LT sa Albay, nag-join sila para magbakasyon sa Misibis Bay, ang popular beach resort sa  lalawigan na pinamumunuan ng aking favorite, si Governor Joey Salceda.

Sina Amy Austria, Lynn Cruz at ang kanilang mga mister na sina  Duke Ventura at Tirso Cruz III ang ilan sa mga member ng Legends na sumama sa Albay trip ni LT na paboritung-paborito na panoorin ang Rhodora X ng GMA 7.

Belo may bagong baby na ipakikilala

Ipapakilala ng Belo Medical Clinic sa susunod na buwan ang bagong Belo Baby sa pamamagitan ng isang bonggang presscon.

Sinabi na sa akin ni Dra. Vicki Belo ang name ng bagong Belo Baby pero nakiusap siya na isikreto ko muna ang identity ng sikat na aktres.

Seksing-seksi ang new Belo Baby sa kanyang pictorial. Siya ang magiging endorser ng Belo Medical Clinic para sa isang non-invasive procedure na nagpapaliit ng tiyan. May “K” na maging endorser ang aktres dahil perfect ang kanyang  flat abs.

Ilalabas muna ng Belo Medical Clinic ang mga billboard ng bagong mystery endorser at kasunod nito ang grand welcome sa kanya .