Claudine gibaslan sa kanhi niya katabang

CEBU, Philippines - Pormal na nga gipasakaan og kasong robbery sa miaging adlaw si Claudine Baretto sa iyang duha ka mga kanhi  katabang nga sila si Jennifer Murillo ug Malou Becher sa Marikina Regional Trial Court.

Dungan niini, mao ang pagbasura sa naunang reklamong qualified theft nga gipasaka ni Claudine batok sa iyang duha ka mga  katabang.

Atol sa pakighinabi sa PEP.ph (Philippine Entertainment Portal) ngadto sa legal counsel nila ni Jennifer ug  Malou nga si Atty. Rico Quicho kagahapon, April 24, gipahayag niya nga niadtong Hulyo o Agusto sa miaging tuig nahitabo ang maong insidente kung diin gipasanginlan ni Claudine ang iyang duha ka katabang  nga matud pa nikawat sa iyang  mahalon nga paintings ug Louis Vuitton bag  didto  sa iyang panimalay sa Loyola Grand Villas.

Apan base sa pagsusi sa prosekusyon, nasayrang gipanag-iya sa bana ni Claudine nga si Raymart Santiago ang  maong mahalon nga mga butang.

Gibutyag ni Atty. Quicho, usa si Raymart sa mga testigo nga  magpamatuod nga puros bakak ang maong alegasyon sa aktres batok sa duha ka kanhi nga mga katabang.

 Nasayran nga si Raymart ang personal nga mikuha sa iyang Louis Vuitton luggage ug paintings gikan sa ilang panimalay.

Kahinumduman nga niadtong Marso sa miaging tuig, milayas ang aktor  sa ilang panimalay gumikan sa panagbangi nila ni Claudine.

Sa affidavit ni Raymart, nagkanayon ang aktor nga wala gikawat sa duha ka katabang ang maong luggage, sanglit siya maoy mikuha  niini  gumikan kay iyaha ang maong mga butang, ug adunay matud pa'y makapamatuod  nga iyaha kadtong tulo ka paintings.

Mini concert sa basilica ugma

Kining maong kanta, mugna sa sikat nga composer nga si Manny Lapingcao alang sa "Kaplag 2014" nga mahitabo karong April 28, diha sa Basilica Pilgrim Center. Ang Rector nga si Fr. Jonas Mejares ug si Lapingcao mao usab ang naghatag og kinabuhi niini.

Ilusad ang commemorative album nga "Gift of Faith in Sto. Niño" alang sa Kaplag 2014, ugma puhon, April 26, diha gihapon sa Pilgrim Center, pinaagi sa usa ka mini-concert nga pagabituonan nila ni Rommel Tuico, Kirby Asunto, Lapingcao, ug Mejares, human sa 5:30pm mass.

Ang nahisgutang album, nagtangag sa mga kanta sa pito ka grand-champions sa Hunino, duha ka original nga compositions ni Mejares, nga Gift of Sto. Niño (the carrier single), ug Vocation: As Sign of Hope Founded in Faith), ingon man pipila ka mga mugna ni Lapingcao, lakip na ang "Ikaw Makaplagan."

Ang lyrics sa nahisgutang kanta ania:

IKAW MAKAPLAGAN

Imong kabubut-on nga

moabot niining yuta

nga gipuy-an sa katawhan mong tabunon

Kay wala unta sa plano

sa mga langyawng nagdala nimo

nga modunggo niining yutang sugbuanon

Apan gipahuros nimo ang hangin

Aron mapadpad sila diri

Ug mabunyagan kami sa imong ngalan

Kay gimahal mo man kami…

Apan wala kaayo makalambo ang pagtuo

 sa una namo nga mga kristiyano

Kay ang mga langyaw nga

niabot niining  yuta

Namauli kay nalupig ni Lapulapu

Ug milabay ang katuigan

Si Padre Urdaneta ug Legaspi miabot man

Ug sa payag nga nasunogan

Imahen mo nakaplagan

** Santo Niño sa among kinabuhi

Imong kabubut-on nga ikaw makaplagan

Santo Niño tungod sa imong gugma

Imong gibuot nga ikaw makaplagan

Ug dinhi gipalambo sa mga paring agustino

Ang natisok nila nga liso sa pagtuo

Ug ilang gipatukod ang imong simbahan

Diha mismo sa lugar diin ka nakaplagan

Paglabay sa daghang katuigan

Midaghan pa ang katawhan

Nga nagtuo ug nagmahal Kanimo

O pinalanggang Santo Niño…(**)

O Senyor Santo Niño

Sa among kasingkasing

Hinaut unta nga ikaw makaplagan

Sa among isigkatawo nga nagatuaw Kanimo

Makita ka unta nila kanamo

Ug makapadayon kami Ginoo

Sa pagpalambo sa pagtuo

Ug daghang saag nga kasingkasing

 nga Makakaplag na Kanimo. (**)

ikaw makaplagan

ikaw makaplagan