Fashionis-ewww o fashionis-true ba ka?

CEBU, Philippines - Gikan sa libro ni Liz Uy nga “styLIZed: 10 Style Essentials”

Nagpagiwalgiwal sa bra? Puti ang racerback top apan migimaw ang bra straps nga puwa? Hanging shirt ang gipares sa leggings? Gipasigwar ang “hubon” ug sampot nga sapyot? Undangi na na ninyo kay, according to style icon Liz Uy, best examples mo sa “fashionis-ewww.”

Sa paglusad sa libro ni Liz Uy dinhi nga giulohan og “styLIZed: 10 Style Essentials,” iyang gituki ang mga puntos ug minus sa atong pagpamiste. Matud niya nga di man kinahanglang mosul-ob gyud ‘tag mahalon o branded aron ingnong angayan. Di sab kinahanglan nga morag tindahan sa sinina ang atong aparador. Ang gikinahanglan nga duna ta sa mosunod: white V-neck shirt, little black dress, slacks, blazer, white button-down shirt, leggings, short pants, tank top, blue jeans, ug pencil skirt. Mahimo na nato ning i-mix and match sa unsay ana-a pa sa atong drawer. Voila! Mora lang og daghag kailis-ilisan.

Hinuon, wala pa malakip niini ang 10 Style Essentials alang sa kalalakin-an, apan mao ni tumong sa ikaduhang hugna puhon sa iyang libro.

Gipasabot ni Liz nga sama na lang sa leggings, dili ta magpataka og sul-ob niini. “Meron kasi itong binabagayan at dapat ang ayos mo babagay sa lugar o okasyon na pupuntahan mo,” niya pa.

Diha bitaw toy babayeng niwang, gibanabanang nagpangedaron og di mokubos sa 50 anyos, nag-brown leggings. Ang naka-minus kay nagbitay ang panapton dapit sa iyang sampot. “That’s the problem if you don’t have full-round buttocks that could hold the cloth in place. Women should choose a legging that fits well, or it would look like sagging skin,” matud ni Liz.

May usa sab ka okasyon diin nasigpatan si Senator Pia Cayetano, dinhi sa Sugbu, alang sa ceremonial gunning-up sa usa ka all-women run, kay hilig man siya og dagan-dagan. Nasigpatan ang nahulma niyang “hubon” kay ang iyang pink tank top taman ra man sa iyang tiyan. Nag sky blue leggings siya niadto. Napasaylo ra ang maong “fashionis-ewww” tungod kay matud pa ni Liz, “the only time you can wear shirts on top of your leggings is when you’re on a workout.”

Kun fashionis-true gyud ka, mao ni imong batasanon: Mas taas nga piraso sa sinina ang ipares sa leggings aron matabunan ang bilahan ug samputan. Labi na kun morampa na kas karsada, sa opisina, sa eskuylahan, sa simbahan o mga lugar ampuanan. Sa ingon di ka maalaan nga si fitness instructor Richard Simmons (o disipulo ni singer Rod Stewart, kinsa hilig kaayo og leggings kadtong batan-on pa siya). Hinuon duna man gyuy tawo nga kusog magpatagad. Apan ayaw sa paagi nga nagsul-ob ka sa gihulagway nga “funny emperor’s clothes” diin ma-kwestiyon hinuon kun sakto ka bas paminsar o kabuot.

Lain nga tip ni Liz Uy mao ni: Wear the right undergarments.

Kun hilig ka’g pahugothugot aron ma-advertise nimo ang imong kahubag, pili-a ang seamless underwear aron dili molakra ang brassiere lines ug pantylines. Kun racerback sab imong shirt nya di ka ka-afford og racer bra, pilia nang strapless nga bra. O gamit sa “invisible bra straps” (ginama sa plastic).

“Mix clothes together appropriately. Know well what’s good for you according to your body type, where you are going or what event you will be attending,” padayon ni Liz. “Huwag mong ipilit ang hindi naman bagay sa klase ng pangangatawan mo.”

Ang maong libro (hardbound) mapalit na sa National Bookstore sa tag-P395 matag kopya.