Joem Bascon: “I don’t say no to a role”

CEBU, Philippines - Wala sa iyang plano ang mamahimong artista, apan karon usa na siya sa mga banggiitan nga character actors sa iyang henerasyon. Si Joem Bascon pito na ka tuig sa industriya, ug nakaplagan kaniadto ni Direk Jerry Sineneng didto sa ilang farm sa Tarlac diin didto gipahigayon ang taping para sa teleserye nila ni Kris Aquino ug Dina Bonnevie, ang Hiram.

Gidala na dayon siya sa ABS-CBN alang sa nagkadaiyang workshops, ug nagdirediretso na ang iyang pagpanimpalad sa showbiz. Gumikan niini, wala na mahuman sa 27-anyos nga actor ang iyang kursong electrical engineering. Sa sinugdanan, nasaypan siya nga si Piolo Pascual sanglit may panahon nga anggid sila og dagway. Apan malampuson nga nakamugna og kaugalingon imahi si Joem isip bankable character actor ug hingpit na nga nakalingkawas gikan sa anino ni Piolo.

Apan kun unsa siya ka maldito o salbahis sa iyang mga karakter sa teleserye, sukwahi ang matuod nga Joem kun walay camera. Sama na lamang pananglit sa subli niyang pagbisita dinhi sa Sugbo isip celebrity guest sa ‘A Million Thanks” promo sa Gaisano Inc., diin nipahigayon siya og mini-show diha sa Gaisano Balamban Town Center ug Country Mall. Mauwawon ug kulit nga Joem ang nakighinabi sa pipila ka mga sakop sa E-Group diha sa Ligthouse Restaurant Mango niadtong tungora. Suma pa niya, wala pa gihapon siya maanad sa padagan sa showbiz, diin mutingog lamang siya kun pangutan-on. Dinhi sa Sugbo hinuon, medyo sinati na niya ang mga sakop sa press hinungdan nga dili na kaayo siya mauwawon.

Sa pito na niya ka tuig sa industriya, usa ka proyekto pa lamang ang wala niya dawata dihang gitanyag kaniya. Kini mao ang indie film nga “Jay” starring Baron Geisler ug Coco Martin. “I turned down Jay. Pinadala sa akin ang script pero hindi pa ako ready nun,” nagkanayon si Joem.

Gipasabot niya nga dili matud pa siya mamili og project, apan ang nahitabo sa Jay niadtong gitanyag kini ngadto kaniya mao nga dili pa siya andam nga makighawok sa sama niyang lalaki. Dili matud pa siya buot nga dili niya mahatagan og hustisya ang iyang role unta sa maong pelikula. Gawas sa Jay, wala na matud pa siya’y gibalibaran nga project sukad-sukad. “I don’t say no to a role because I’m a character actor. Kahit ano pang ibato sa akin, pipilitin ko talaga na magawa ko,” niya pa.

Para niya, ang indie film nga “Lihis” sa nilabay nga tuig ang labing kontrobersyal ug labing lisud nga proyekto para niya, ilabi na kay period movie kadto. Nagduhaduha matud pa siya sa sinugdanan, apan dihang nabasa na nila ni Jake Cuenca ang script nga ginama ni Ricky Lee, nahugyaw sila niini hinungdan nga ilang gidawat. Pun-an pa nga si Joel Lamangan ang director. May lovescene sila si Jake ug Joem sa maong pelikula. Suma pa niya, iyang gihatag ang tanan sanglit kumbinsido siya sa istorya sa pelikula ug nisalig siya kang Lamangan ug Lee.

Sa teleserye nga “The Legal Wife” starring Angel Locsin ug Jericho Rosales, kontrabida si Joem isip Javi. Giangkon niya nga dili na siya kumportabli sa iyang character gumikan kay lahi na ang kasalbahis ni Javi sanglit musukol naman kini sa iyang mga ginikanan. Lainan matud pa siya maghunahuna niini, ug hasta ang iyang mga higala nireklamo na sa ka maldito sa iyang character. Pero muabot matud pa ang punto nga mapakita niya nga adunay konsensiya si Javi. Suma pa ni Joem nga daghan pa siya og gipangandoy nga roles. Buot niya nga sa umaabot makahimo siya og proyekto diin usa siya ka “transsexual na total transformation talaga emotionally.’ Ganahan sab siya nga mamahimong “schizophrenic na may five personalities kung kaya.”

Ni Joem pa buhaton niya ang tanan nga iyang makaya sa matag niya proyekto isip bugti sa kaayo sa showbiz ngadto kaniya sanglit sukad sa sinugdanan hangtud karon wa gayud siya mabakante. “ I’m giving back because showbiz loves me.” Happily in love siya ngadto kang Trisha Uy, kinsa kaliwat og taga Cebu ug usa ka commercial model. Tulo na matud pa ka tuig ang ilang relasyon, apan wala pa silay plano nga magminyo sanglit buot pa niya nga magtigom alang sa umaabot. Usa sa pamaagi niya mao ang pagbukas og nail spa, kauban ang iyang mga higala.

Unsay buot niyang mahinumduman sa publiko sa higayon nga madungog nila ang ngalang Joem Bascon? “A happy guy who portrayed all the roles in Philippine cinema.”