Boses ng mga bulilit maririnig ngayong summer!

MANILA, Philippines - Muling hahanapin ng ABS-CBN ang susunod na singing superstar sa pagbabalik ng ultimate singing-reality search, ang top-rating at Twitter-trending na The Voice of the Philippines ngayong summer.

Unang handog nito ngayong taon ang The Voice Kids na maririnig ang mga pinaka-nakakabilib at ka­kaibang boses ng mga bulilit na may edad na walo hanggang 14 taong gulang.

Muling uupo bilang coaches ng The Voice of the Philippines kids ang Pop Princess na si Sarah Geronimo, Rock Superstar na si Bamboo, at Broadway Diva na si Lea Salonga sa panibagong edisyon nito.

Pangungunahan naman ito nina Luis Manzano at season one V Reporter na si Alex Gonzaga bilang hosts.

Gumawa ng ingay ang unang season ng The Voice of the Philippines sa naiiba nitong format kung saan boses at hindi hitsura o kuwento ng buhay ang bida.

Itinanghal na unang The Voice of the Philippines si Mitoy ng Team Lea na talaga namang pinatuna­yang isa siyang world-class talent na maaaring ipagmalaki sa buong mundo.

Naging matagumpay ang Pinoy adaptation ng sikat na international TV franchise na sinubayba­yan ng publiko mapa-TV, online, o mobile man da­hil linggu-linggo itong nanguna sa ratings, pinag-usapan sa social media, at hinimok ang mga ma­nonood na iboto ang kanilang mga pambato.

Pumatok din sa mga Pinoy ang “blind auditions” nito kung saan kinailangang kumanta ang auditio­nees habang nakatalikod ang coaches.

Hindi lang ang artists ang naglaban-laban sa kumpetisyon kundi pati na rin ang coaches mula sa pagpipili nila ng artists at sa showdown ng kani-ka­nilang teams sa live shows hanggang sa finale.

Abangan ang The Voice Kids sa ABS-CBN nga­yong tag-init na!